Atyraý qalasy ákimdiginiń aldynda, Jaiyq ózeniniń boiynda zańsyz oiyn avtomattary jumys istep tur. Bul máseleni jergilikti bloger Rústem Baiaziev kóterip, áleýmettik jelide video jariialady, dep habarlaidy Dalanews.kz.
Blogerdiń aitýynsha, balalarǵa arnalǵan bul apparattarda úlken aqsha ainalyp jatyr.
“Oiynshyq alý úshin apparatqa 200 teńge salasyń, biraq temiri qyspaidy. Iaǵni oiynshyqty alý múmkin emes. Kózge kórinbese de, munda úlken kólemde aqsha ainalyp jatyr. Al apparatty qoiýǵa eshqandai ruqsat qaǵazy joq. Keshe maǵan 100-den asa ata-ana habarlasyp, balalary osy avtomattarda birashama aqsha joǵaltqanyn aitty. Biz endi balany jylatpaý úshin barymyzdy salamyz. Bul apparattar balalardy kishkentaiynan azartqa úiretetin quralǵa ainalyp otyr”, – deidi Rústem Baiaziev.
Sondai-aq ol oiyn avtomattarynyń qalalyq ákimdiktiń dál aldynda turǵanyn synǵa aldy.
“Ákimdiktiń aldynda bir emes, birneshe apparat qoiylǵan. Ony ákimdik qyzmetkerleri kórmedi degenge senbeimin. Bul zańsyzdyqqa kim jaýap beredi? Ákimdik qaida qarap otyr? Ne masqara mynaý? Munyń artynda kim tur?” – dep shúilikti bloger.
Blogerdiń aitýynsha, Atyraýda balalardyń oiyn-saýyǵyna arnalǵan nysandar tapshy. Sondyqtan demalýǵa kelgen balalar amalsyzdan oiyn avtomattaryna tartylady.
“Balalar utylyp jylasa, ata-analary da aqsha joǵaltady. Qazirgi tańda politsiia osy is boiynsha tekserý jumystaryn júrgizip jatyr”, – dedi ol.
Sonymen qatar Baiaziev oiyn avtomattarynyń artynda yqpaldy adamdar turǵan bolýy múmkin ekenin aityp, apparattardyń ruqsat qaǵazdaryn tekserýdi jáne olardyń zańdylyǵyn anyqtaýdy talap etti.
