Atyraý oblysynda kólik janyp ketip, 4 adam qaza tapty, - dep habarlaidy Dalanews.kz.
Óńirdiń Politsiia departamentiniń málimetinshe, bir saǵat buryn jolda eskertý alǵan júrgizýshi jol apatyna túsip, tórt adam qaza tapty.
26 qazanda Atyraý oblysy politsiia departamenti janyndaǵy patrýldik politsiia rotasynyń qyzmetkerleri Atyraý-Oral tasjolynda 4:00 shamasynda Resei elinde tirkelgen Daewoo Nexia avtokóligin toqtatyp, jol júrisi erejesiniń talaptaryn buzǵany úshin júrgizýshisine hattama toltyrǵan jáne túngi ýaqytta saqtyq sharalaryna muqiiat bolý kerek ekenin eskertken.
"Eskertýlerge qaramastan tańǵy saǵat 06:00 shamasynda Atyraý-Oral tasjolynda Daewoo Nexia avtokóliginiń 38 jastaǵy júrgizýshisi basqarý júiesin igere almai, qarama-qarsy baǵytta kele jatqan júk kóligimen soqtyǵysqan. Jol apaty saldarynan Daewoo Nexia kóliginiń júrgizýshisi men 3 jolaýshysy oqiǵa ornynda kóz jumdy, kólik tolyqtai otqa orandy", - dep jazylǵan habarlamada.
Qazir bul derek boiynsha qylmystyq is tirkelip, keshendi tergeý amaldary júrgizilip jatyr.
"Qurmetti jol qozǵalysynyń qatysýshylary! Jol qatelikterdi keshirmeidi! Ózińizdiń jáne ózgelerdiń densaýlyǵy men ómirine qaýip tóndirmei, alys saparlarǵa túngi mezgilde shyqpaýlaryńyzdy jáne sharshańqy kúide kólik basqarmaýlaryńyzdy suraimyz! Jol qozǵalysy erejelerin saqtańyzdar!" - dep eskertti politsiia.
