Atyraý oblysynda erli-zaiyptynyń ólimine qatysty is boiynsha kúdiktiler osy aida Qazaqstanǵa jetkiziledi, dep habarlaidy Dalanews.kz.
Ishki ister ministrligi olardy elge qaitarý baǵyttaryn pysyqtap qoiǵan. Bul týraly Qazaqstan Ishki ister ministriniń orynbasary Sanjar Ádilov málimdedi.
Ádilovtiń aitýynsha, qazirgi ýaqytta atalǵan qylmystyq is boiynsha Indoneziiadan Qazaqstanǵa eki kúdiktini ekstraditsiialaý máselesi sheshilgen.
«Olar jaqyn arada Qazaqstanǵa jetkiziledi. Biz olardy osy aida alyp kelemiz. Basqa elderdegi áriptesterimizben birge kelý baǵyttaryn pysyqtap qoidyq jáne ári qarai jumysty qoldanystaǵy Qylmystyq-protsestik kodeks talaptaryna sáikes jalǵastyramyz», – dedi ol.
Buǵan deiin politsiia atalǵan is boiynsha Indoneziiada kúdiktimen birge 30 jastaǵy qazaqstandyq Aqbaian Muqanǵalieva da ustalǵanyn habarlaǵan bolatyn. Qazir onyń bul is boiynsha quqyqtyq mártebesi naqtylanyp jatqany aityldy.
Jýrnalister Ádilovten ustalǵan áieldiń naqty qandai mártebede – kúdikti me, álde kýáger me – ótip jatqanyn surady. Ministrdiń orynbasary bul másele tergeý barysynda anyqtalatynyn jetkizdi.
