Atyraý oblysynda izim-ǵaiym joǵalǵan otbasyna qatysty tyń derek shyqty, dep habarlaidy Dalanews.kz.
Atyraý oblysy Politsiia departamenti bastyǵynyń birinshi orynbasary, politsiia polkovnigi Quttybai Sadykovtyń aitýynsha, qazir atalǵan is boiynsha túrli rastalmaǵan aqparattar tarap jatyr.
"25 jeltoqsanda tórt adamnyń joǵalǵany týraly aqparat túsken sátten bastap elimizdiń aýmaǵynda keshendi izdestirý sharalary júrgizilip jatyr. Bul derek boiynsha qylmystyq is tirkeldi. Qoldanystaǵy zańnamaǵa sáikes eki nemese odan da kóp adamnyń joǵalýy adam óltirý baby boiynsha saralanady. Osyǵan bailanysty qazir joǵalǵan otbasynyń ornalasqan jerin anyqtaý jáne olardy tabý maqsatynda barlyq qajet jedel-izdestirý jáne tergeý is-sharalary júzege asyrylyp jatyr. Tergeý aiasynda barlyq meditsinalyq mekeme, onyń ishinde jekemenshik klinikalar da tekserilip jatyr", - dedi politsiia.
Sonymen qatar, joǵalǵan adamdardyń uialy telefondarynan signaldar Qazaqstan aýmaǵynda birneshe ret tirkelip, qosylyp-sóndirilgeni anyqtalǵan.
"Sońǵy tirkelgen derek Shymkent qalasynda bolǵan. Izdestirý jumystaryn úilestirý maqsatynda arnaiy jedel tergeý toby qurylyp, oǵan Ishki ister ministrliginiń mamandary da jumyldyryldy. Sonymen qatar, qazir osy otbasynyń kishi qyzy men kúieý balasynyń shet memlekette júrgeni anyqtaldy. Alaida týystary olardyń joǵalýyna bailanysty aryz túsirmegen. Soǵan qaramastan quqyq qorǵaý organdary tekserý jumystaryn bastady", - dedi politsiia.
Eske salaiyq, buǵan deiin Atyraý oblysynda bir otbasy izdestirilip jatqany habarlandy.
