Atyraý munaı óńdeý zaýytynda 1 qazannan bastap josparly-aldyn alý jumystary bastaldy, dep habarlaıdy Dalanews.kz kásiporynnyń baspasóz qyzmetine silteme jasap. 

Jumystarǵa 1800-den astam maman qatysyp, ydystardy, apparattardy, peshterdi jáne tehnologıalyq qubyrlardy tekseredi. Sondaı-aq reaktorlardy jóndeý, kolonnalardyń ishki qurylǵylaryn jańartý jáne basqa da tehnologıalyq sharalar josparlanǵan.

“Josparly-aldyn alý jumystary kezeńinde munaı ónimderin tıep-jóneltý aldyn ala qalyptastyrylǵan qor esebinen júzege asyrylady. Zaýyttyń rezervýarlyq parkinde 37 myń tonna avtobenzın, 30 myń tonna dızel otyny jáne 6,8 myń tonna avıaotyn jınaqtalǵan. Bul qorlar zaýyttaǵy jumystar júrgiziletin ýaqyttyń barlyǵynda batys óńirlerge munaı ónimderin birqalypty ári ýaqytyly jetkizýge múmkindik beredi”, – dep málimdedi kásiporyn.

Tehnologıalyq qondyrǵylardy kezeń-kezeńimen iske qosý 25 qazannan bastap josparlanǵan.