Quryltai depýtaty Ashat Aimaǵambetov áleýmettik saladaǵy memlekettik shyǵyndardyń tiimdiligine qatysty birqatar máseleni kóterdi. Onyń aitýynsha, biýdjet qarajatynyń artyq jumsalýyna zańsyz árekettermen qatar, qajetsiz rásimder de sebep bolýy múmkin, dep habarlaidy dalanews.kz.
Bul týraly depýtat Telegram arnasynda jazdy.
Aimaǵambetov mysal retinde múgedektikti qaita rastaý úshin azamattardy mindetti túrde aýrýhanaǵa jatqyzý talabyn atady. Onyń sózinshe, adamnyń jaǵdaiy turaqty ári qaitymsyz bolsa jáne gospitalizatsiia emdeýge qajet bolmasa, tek meditsinalyq-áleýmettik saraptamaǵa joldama alý úshin statsionarǵa jatqyzýdyń qajettiligi joq.
Mundai jaǵdaida azamat dárigerge jazylyp, analiz tapsyryp, joldama rásimdep, gospitalizatsiia kezegin kútýge májbúr bolady. Bul MÁMS júiesi úshin qosymsha shyǵynǵa, dárigerlerge artyq júktemege jáne basqa patsientterdiń aýrýhana tósegin uzaq kútýine ákeletinin depýtat atap ótti.
Aimaǵambetovtyń aitýynsha, másele Densaýlyq saqtaý jáne Eńbek ministrlikterimen birge talqylanyp, tiisti normativtik aktilerge ózgerister engizý boiynsha sheshimder qabyldanǵan.
Depýtat taǵy bir mysal retinde onkologiialyq statsionarǵa jatqyzar aldynda júrek aýrýy bolmasa da EKG, ehokardiografiiadan ótý jáne kardiolog keńesin alý talabyn keltirdi. Onyń málimetinshe, Qaraǵandydaǵy bir onkologiialyq ortalyqtyń ózinde jylyna shamamen 17 myń gospitalizatsiia júrgiziledi. Sonyń saldarynan myńdaǵan zertteý qaitalanýy múmkin.
Aimaǵambetov mundai máselelerdi sheshý úshin tsifrlandyrý men jasandy intellektini engizýmen qatar, qoldanystaǵy rásimderdiń ózin qaita qaraý qajet dep sanaidy.
"Eger artyq rásimdi jai ǵana elektrondy formatqa kóshirsek, ol elektrondy bolady, biraq artyq rásim bolyp qala beredi", – dep jazdy depýtat.
Onyń pikirinshe, meditsinalyq-áleýmettik saraptama júiesinde de negizsiz múgedektik rásimdeýge jol bermeý men shynymen kómekke muqtaj azamattar úshin kedergilerdi azaitý qatar júrýi kerek.
Aimaǵambetov reformalardyń nátijesinde biýrokratiia men teris paidalaný múmkindikteri azaiyp, tiisti kómekti qajet etetin azamattarǵa qyzmet ýaqytyly kórsetilýi tiis ekenin atap ótti.
