Qorǵanys ministrligi Astanada áskeri tehnika ne úshin júrgenin túsindirdi, - dep habarlaidy Dalanews.kz.
Qorǵanys ministrliginiń málimetinshe, qarýly kúshterdiń jaýyngerlik daiyndyq baǵdarlamasy sheńberinde 13 naýryzynda Aqmola garnizony áskeri bólimderiniń áskeri qyzmetshileri Astana qalasynyń mańyndaǵy belgilengen aýdandarǵa jaýyngerlik tehnikamen marsh jasaidy.
Is-shara garnizon áskeri bólimsheleri kúshteri men quraldarynyń jaýyngerlik ázirligin keshendi tekserýdiń kezekti kezeńine baǵyttalǵan.
"Atalǵan ýaqyt aralyǵynda elordanyń mańynda, sondai-aq Qaraǵandy trassasynda áskeri tehnika legi ótip bara jatqan kezde joldarda kólik quraldary qozǵalysynyń ýaqytsha shekteýleri engizilýi múmkin ekenin habarlaimyz. Osyǵan bailanysty azamattardan ótip jatqan is-sharalarǵa túsinistikpen qaraýdy jáne tynyshtyqty saqtaýdy suraimyz", - deidi ministrliktegiler.
Sonymen qatar, ministrlik áleýmettik jelilerdi paidalanýshylardan áskeri tehnikanyń qozǵalysy týraly jalǵan habarlamalar men beinematerialdar taratpaýdy jáne tek resmi aqparat kózderine senýdi surady.
