قورعانىس مينيسترلىگى استانادا اسكەري تەحنيكا نە ءۇشىن جۇرگەنىن ءتۇسىندىردى، - دەپ حابارلايدى Dalanews.kz.
قورعانىس مينيسترلىگىنىڭ مالىمەتىنشە، قارۋلى كۇشتەردىڭ جاۋىنگەرلىك دايىندىق باعدارلاماسى شەڭبەرىندە 13 ناۋرىزىندا اقمولا گارنيزونى اسكەري بولىمدەرىنىڭ اسكەري قىزمەتشىلەرى استانا قالاسىنىڭ ماڭىنداعى بەلگىلەنگەن اۋداندارعا جاۋىنگەرلىك تەحنيكامەن مارش جاسايدى.
ءىس-شارا گارنيزون اسكەري بولىمشەلەرى كۇشتەرى مەن قۇرالدارىنىڭ جاۋىنگەرلىك ازىرلىگىن كەشەندى تەكسەرۋدىڭ كەزەكتى كەزەڭىنە باعىتتالعان.
"اتالعان ۋاقىت ارالىعىندا ەلوردانىڭ ماڭىندا، سونداي-اق قاراعاندى تراسساسىندا اسكەري تەحنيكا لەگى ءوتىپ بارا جاتقان كەزدە جولداردا كولىك قۇرالدارى قوزعالىسىنىڭ ۋاقىتشا شەكتەۋلەرى ەنگىزىلۋى مۇمكىن ەكەنىن حابارلايمىز. وسىعان بايلانىستى ازاماتتاردان ءوتىپ جاتقان ءىس-شارالارعا تۇسىنىستىكپەن قاراۋدى جانە تىنىشتىقتى ساقتاۋدى سۇرايمىز"، - دەيدى مينيسترلىكتەگىلەر.
سونىمەن قاتار، مينيسترلىك الەۋمەتتىك جەلىلەردى پايدالانۋشىلاردان اسكەري تەحنيكانىڭ قوزعالىسى تۋرالى جالعان حابارلامالار مەن بەينەماتەريالدار تاراتپاۋدى جانە تەك رەسمي اقپارات كوزدەرىنە سەنۋدى سۇرادى.
