Astanadaǵy Respýblikalyq fizika-matematika mektebiniń oqýshysy Bórte Sairanbekqyzy álemniń eń bedeldi ýniversitetteriniń biri — Harvard University-ge oqýǵa tústi, dep habarlaidy Dala News.
Bórte mektepte 6-synyptan bastap bilim alyp, oqý barysynda Advanced Placement (AP) baǵdarlamasyna qatysqan. Ol 10-synyptan keiin-aq jeti AP emtihanyn tapsyryp, AP International Diploma iegeri atandy.
Oqýshy qazaq, orys, aǵylshyn tilderin erkin meńgergen, sondai-aq qytai tilin oqyp júr. Halyqaralyq emtihandardan — SAT, IELTS, CAE, HSK — joǵary nátije kórsetken.
Bilimmen qatar, ol ǵylymi jobalarǵa qatysyp, áleýmettik jáne shyǵarmashylyq bastamalarda belsendi bolǵan. Óz sózinshe, Garvardqa túsý — júieli daiyndyq pen joǵary motivatsiianyń nátijesi.
Aita keteiik, Harvard University 1636 jyly qurylǵan jáne AQSh-taǵy eń kóne joǵary oqý orny sanalady. Ol álemniń eń úzdik ýniversitetteriniń biri retinde tanylǵan.
