Astanadaǵy Nazarbaev Ziiatkerlik mektebiniń (NZM) oqýshysynyń ata-anasy mektep ákimshiliginiń áreketsizdigine bailanysty politsiiaǵa aryz jazǵan. Olardyń aitýynsha, uzaq ýaqytqa sozylǵan psihologiialyq qysym men qatarlastarynyń shettetýi saldarynan jasóspirimniń psihologiialyq jaǵdaiy kúrt nasharlaǵan, dep habarlaidy dalanews.kz.
Halyqstan portalynyń málimetinshe, grant negizinde bilim alǵan oqýshy synyp starostasy bolyp, mektep ómirine belsendi aralasqan. Alaida segizinshi synypta qatarlastary onymen qarym-qatynasty toqtatyp, oqýshy áleýmettik oqshaýlanýǵa tap bolǵan.
Anasynyń sózinshe, synyptastary onymen sóilespei, birge otyrýdan bas tartqan. Ata-anasy birneshe ret mektep kýratory men psihologyna júgingenimen, másele sheshimin tappaǵanyn aitady.
Ýaqyt óte kele jasóspirimniń psihologiialyq jaǵdaiy nasharlap, ózine qol jumsaý týraly oilar paida bolǵan. Memlekettik aýrýhana dárigerleri onyń jaǵdaiyn aýyr dep baǵalap, basqa mektepke aýystyrýdy usynǵan.
Alaida ata-anasynyń aitýynsha, bul sheshim onyń jaǵdaiyn birden jaqsarta qoimaǵan. Qazir jasóspirim mamandardyń baqylaýynda jáne tiisti em qabyldap jatyr.
Oqiǵadan keiin ata-anasy quqyq qorǵaý organdaryna júgingen. Olardyń málimetinshe, is materialdary sáýir aiynan beri prokýratýranyń qaraýynda jatyr.
Ázirge Nazarbaev Ziiatkerlik mektebi men quqyq qorǵaý organdary bul jaǵdaiǵa qatysty resmi pikir bildirmedi.
