Áleýmettik jelilerde Astanadaǵy balalar aýrýhanasynda týberkýlez infektsiiasy taralǵany týraly aqparat keńinen talqylanyp jatyr. Osyǵan bailanysty elordanyń qoǵamdyq densaýlyq saqtaý basqarmasy resmi túsinikteme berip, jaǵdai baqylaýda ekenin málimdedi, dep habarlaidy dalanews.kz.
Medbike bailanysta bolǵandar qatarynda bolmaǵan
Astana qalasynyń qoǵamdyq densaýlyq saqtaý basqarmasynyń málimetinshe, №1 kópbeiindi qalalyq balalar aýrýhanasynda jumys istegen medbike týberkýlez juqtyrǵandarmen bailanysta bolǵan adamdar tiziminde bolmaǵan jáne meditsinalyq mekemede jumys isteýge resmi túrde ruqsat alǵan.
Vedomstvo dereginshe, ol eńbek qyzmetin atqaryp júrgen ýaqytta týberkýlez infektsiiasyna qatysty eshqandai belgiler anyqtalmaǵan. Sonymen qatar aýrýhana qyzmetkerleriniń josparly fliýorografiialyq tekserý nátijeleri boiynsha patologiia tirkelmegen.
39 qyzmetker qaita tekserýden ótti
Basqarma málimetine sáikes, týberkýlezben bailanysta bolýy múmkin degen 39 qyzmetker qosymsha fliýorografiialyq tekserýden ótken. Olardyń sońǵy meditsinalyq tekserýden ótkeni alty aidan asqan.
Tekserý qorytyndysynda barlyq qyzmetkerden teris nátije shyqqan.
– Medbike sońǵy ret 2026 jyldyń aqpan aiynda emhanada fliýorografiiadan ótken, sol kezde eshqandai patologiia anyqtalmaǵan. Densaýlyǵy nasharlaǵannan keiin ol biyl sáýirde dárigerlerge júgingen. Sol kezde aýrý anyqtaldy. Onyń jumysqa sońǵy shyqqan kúni – 24 sáýir. Qazir ol 2026 jyldyń 27 sáýirinen bastap qalalyq ftiziopýlmonologiia ortalyǵynda em qabyldap jatyr, – dep habarlady basqarma.
Vedomstvo ókilderiniń aitýynsha, qazirgi ýaqytta profilaktikalyq jáne sanitarlyq sharalar kúsheitilgen. Sońǵy úsh ai ishinde naýqaspen bailanysta bolǵan adamdar anyqtalyp, baqylaýǵa alynǵan. Sondai-aq basqarma jumysqa qabyldanatyn barlyq qyzmetker mindetti túrde fliýorografiialyq tekserýden ótetinin, onyń nátijesi sanitarlyq kitapshaǵa engiziletinin atap ótti.
Aýrýhanada tósek jabdyqtary, sonyń ishinde jastyqtar men kórpeler arnaiy kameralyq dezinfektsiiadan ótkizilgen. Al kleenkamen qaptalǵan matrastar arnaiy eritindilermen óńdelgen.
Budan bólek, statsionar palatalary men ózge de bólmelerde kúnine keminde eki ret dezinfektsiialyq tazalaý júrgizilip, bakteritsidti shamdarmen kvartstaý jasalady. Sondai-aq ǵimaratty turaqty jeldetý tártibi saqtalyp otyrǵany aityldy.
