Osy aptadan bastap Astanadaǵy barlyq avtoturaq keńistigi qalanyń kommýnaldyq qyzmetteriniń qaramaǵyna ótti. Bul týraly elorda ákimi Jeńis Qasymbek málimdedi, dep habarlaidy Dalanews.kz.
Ákimniń aitýynsha, ótken aptada avtoturaq ýchaskeleri men keńistikterin qala menshigine óteýsiz berý týraly kelisimge qol qoiylǵan.
"Osy aptadan bastap qalanyń barlyq avtoturaq keńistigi tek kommýnaldyq qyzmetterge tiesili. Iaǵni, endi bul salada jeke menshik joq", - dedi Qasymbek dúisenbi kúni Ortalyq kommýnikatsiialar qyzmeti alańynda ótken brifingte.
Qala basshysy elordanyń kólik júiesin damytýǵa arnalǵan keshendi baǵdarlamada avtoturaq saiasaty qarastyrylǵanyn atap ótti.
"Qalalyq qyzmetter minýtyna tólem engizýdi josparlap otyrǵan joq. Álemdik tájiribege súienemiz. Orny men joldyń júktemesine qarai 15 minýttan bir saǵatqa deiingi ýaqytsha aralyq bolady. Birqatar nysandardy túbegeili qaita qaraimyz: áleýmettik mekemelerdiń mańynda aqyly avtoturaqtar bolmaidy. Kóptegen oryndar múlde tegin bolady. Al keptelis jii bolatyn aimaqtarda kólikti uzaq ýaqyt qaldyrmaýǵa yntalandyramyz", - dep túsindirdi qala ákimi jańa tariftik saiasattyń qaǵidattaryn.
