Elordada kólik júrgizýshisine qarýdan oq atqan kúdikti ustaldy. Jaralanǵan azamattyń quqyq qorǵaý organdarynyń qyzmetkeri ekeni belgili boldy, dep habarlaidy Dalanews.kz.
Politsiia málimetinshe, kúdikti – 21 jastaǵy qala turǵyny. Ol júrgizýshige ańshylyq myltyqpen oq atyp, oqiǵa ornynan boi tasalaǵan. Jedel-izdestirý sharalary barysynda kúdikti qolǵa túsip, qarý tárkilendi. Qazir dosýdebtik tergeý bastaldy.
Jábirlenýshiniń quqyq qorǵaý organynda qyzmet etetini, alaida oqiǵa kezinde eńbek demalysynda bolǵany anyqtaldy.
«Atalǵan qarý kúdiktiniń ákesine tiesili. Ol qarýdy saqtaý talaptaryn buzǵany úshin ákimshilik jaýapkershilikke tartyldy», – dep habarlady politsiia.
Áleýmettik jelilerde taraǵan beiresmi nusqada kúdikti jolǵa shyǵyp, qozǵalyp kele jatqan kólikke oq atqany, al júrgizýshi ózin qorǵaý maqsatynda shabýyl jasaǵan adamdy qaǵyp ketkeni aitylady. Alaida bul aqparat resmi túrde rastalǵan joq.
Tergeý múddesine bailanysty ózge derekter jariialanbaidy.
