Búgin «qurǵaq» qaldyqtarǵa arnalǵan 19 sary konteıner «Esil» aýdanynda ornalasqan tórt turǵyn úı kesheninde ornalastyryldy. Shildede 45 aýlada osyndaı 200 jáshik qoıylady dep josparlanýda. Jalpyl alǵanda, qalada sary tústi 6 276 konteıner paıda bolady dep kútilýde.
– Biz qoqysty bólip jınaýdyń eń qarapaıym júıesin tańdap aldyq. Qaıta paıdalanylatyn shıkizat sary konteınerge túskennen keıin qaldyqtardy óńdeıtin zaýytqa jetkiziletiledi. Qanatqaqty joba óńdeý tereńdigin 25%-ǵa jetkizýge múmkindik beredi, – dep málimdedi qorshaǵan ortany qorǵaý jáne tabıǵatty paıdalaný basqarmasy qaldyqtardy basqarý bóliminiń basshysy Aınur Sultanǵulova.
Joba aýa lastaýyshtarynyń mólsherin, qaldyqtar jetkiziletin polıgondar sanyn azaıtyp, tabıǵı resýrstardy saqtaýǵa, olardy únemdeýge múmkindik beredi. Atalmysh jobany qala ákimdigi «Operator ROP» JSHS-men birlesip iske asyryp jatyr. Sary konteınerlerdi Qazaqstanda jasalǵan mamandandyrylǵan jańa tehnıkanyń 25 birligi bosatyp turady.
– Qaǵaz qaldyqtarynan karton qoraptardy, gıgıenalyq buıymdardy jasaýǵa bolady. Shyny bolsa, túrli qutylardy, plasık, metal shelekterdi, legenderdi jasaý úshin qaıta qoldanýǵa jaramdy, – dep túsindirdi «Operator ROP» JSHS-niń basqarýshy dırektory Sergeı Iýrcha.
Onyń aıtýyna qaraǵanda, jyl saıyn Astanada qatty turmystyq qaldyqtardyń 300 myńnan astam tonnasy qalyptasady eken. Bul, shamamen, táýligine 1000 tonna. Qaldyqtardyń atalmysh kóleminiń 45% – qaıta qoldanylyp, óńdeýge jaramdy shıkizat.
