Kúndizgi reıd elordanyń barlyq bes aýdanynda ótkiziledi. Olarǵa eriktiler, belsendiler, tanymal sportshylar qatysady. Belsendilerdiń arasynda sportshy hám áleýmettik kásipker Aıtym Jaqypov bar.
– Búgin bizde ákimdikpen jáne polısıa departamentimen birlesip «Toqta, vandal» kezekti aksıasy ótti. Biz qalamyzdaǵy kóshe men saıabaqtarda boıalǵan, qalamdarmen esimder jazylǵan kóptegen oryndyqtar bar ekenin kórdik. Bul is-sharanyń negizgi maqsaty – jastardy eń aldymen sportqa qyzyqtyrý, sodan keıin qoǵamnyń múlkin kózdiń qarashyǵyndaı aıalap utsaýǵa úndeýdi kózdeımiz. Osylaısha qoǵamdyq sanany oıatyp, el azamattary arasynda patrıottyq sezimdi arttyrýdy kózdep otyrmyz, – dedi Aıtym Jaqypov aksıa týraly.
Naýqanǵa qatysýshylar reıdter kezinde kóshelerdi qoqystardan jáne jazýlardan tazartady, qala turǵyndaryna qoǵamdyq tártipti saqtaýdyń mańyzdylyǵy týraly profılaktıkalyq túsindirý júrgiziledi jáne olardy sportqa qyzyqtyrady.
– «Toqta, vandal» aksıasy jyl basynan beri ákimdiktiń qoldaýymen ótkizilip keledi. Oǵan «Astana jastary» JRO eriktileri, belsendi azamattar, qala turǵyndary, qoǵam belsendileri qatysyp jatyr. Reıdter elordanyń barlyq bes aýdanynda ótýde, – dep atap ótti NEET sanatyndaǵy jastarmen jumys bóliminiń basshysy Álfarabı Aımaq.
Esterińizge sala keteıik, jyl basynan beri quqyq qorǵaý organdary vandalızm áreketi úshin 100-den astam adamdy anyqtap, jaýapqa tartty. Qala boıynsha kúndelikti patrúldeýdi eki myńnan astam polısıa qyzmetkeri júzege asyrady.
