Astanada jazǵy maýsym bastalysymen sý aidyndarynda demalýshylar sany artady. Osyǵan bailanysty qala prokýratýrasy men Tótenshe jaǵdailar departamenti aldyn alý jumystaryn kúsheitti, dep habarlaidy Dalanews.kz
Qajetti normativtik qujattar ázirlenip, bekitildi, Esil ózeninde táýlik boiy patrýldeý uiymdastyryldy, qaýipti aýmaqtarǵa eskertý belgileri ornatyldy jáne bilim berý mekemelerinde qaýipsizdik kúsheitildi.
Qala aýmaǵynda shomylýǵa arnalǵan 5 resmi oryn belgilengen: Ortalyq jaǵajai, «Tri peskaria» «Tri peskaria» (Kóktal-1), «Armina», «Stolichnyi dvor» (Kúigenjar) jáne Beisekova kóshesinde kópir mańyndaǵy kommýnaldyq jaǵajai.
Ruqsat etilmegen jerlerde shomylýǵa qatań tyiym salynǵan.
2023 jyly elorda sý aidyndarynda 4 adam, onyń ishinde bir jasóspirim qaza tapty. Qaiǵyly jaǵdaidyń bári shomylýǵa tyiym salynǵan jerlerde ári qaýipsizdik erejelerin saqtamaýmen bailanysty bolǵan: jabdyqtalmaǵan oryndarda shomylý, alkogoldik mas kúide sýǵa túsý jáne balalardy qaraýsyz qaldyrý.
TJD qarapaiym qaýipsizdik erejelerin saqtaý qajettigin eskertedi: tek arnaiy belgilengen jáne jabdyqtalǵan jerlerde shomylý, qalqymadan asyp júzbeý, balalardy qaraýsyz qaldyrmaý jáne mas kúide sýǵa túspeý.
Bul erejelerdi buzǵany úshin ákimshilik jaýapkershilik qarastyrylǵan. Ótken jyly 1,5 million teńgege 264 ákimshilik hattama toltyrylǵan.
Qalanyń barlyq aýdanynda prokýratýra, TJD, politsiia jáne ákimdik ókilderiniń qatysýymen reidter ótip jatyr. Sý aidyndary, ruqsat etilmegen shomylý oryndary, sýburqaqtar jáne ózge de qaýipti aimaqtar, ásirese balalar jii baratyn oryndar tekserilýde.
«Kámeletke tolmaǵandar úshin qaýip tóndiretin jerler erekshe baqylaýda», – dedi Astana qalasy prokýrorynyń kámeletke tolmaǵandar isteri jónindegi aǵa kómekshisi Aigerim Ómirzaqova.
Dron kómegimen shomylýǵa arnalmaǵan jaǵalaý aýmaqtary anyqtalyp jatyr. Mysaly, Saraishyq aýdanynda qaýipti sý qoimasy anyqtalyp, sol jerde eskertý belgileri ornatylyp, jaýapty qyzmetterdiń kezekshiligi uiymdastyryldy jáne monitoring júrgizilýde.
«Astana qalasy TJD azamattyq qorǵanys basqarmasynyń qyzmetkerleri Esil ózeni men basqa da qaýipti aimaqtardy táýlik boiy patrýldeidi», – dedi Astana qalasy Tótenshe jaǵdailar departamentiniń Azamattyq qorǵanys basqarmasynyń bastyǵy Renat Smaǵulov.
Qazirgi tańda sýdaǵy oqys oqiǵalardyń aldyn alý, ereje buzýshylardy anyqtaý jáne turǵyndardy qaýipsizdik erejelerimen tanystyrý maqsatynda turaqty túrde reidtik is-sharalar júrgizilýde.
