Atyraýda Sultan Sársemálievke qatysty qylmystyq is boiynsha kezekti sot otyrysy ótti. Sot barysynda memlekettik aiyptaýshy aiyptaý aktisine engizilgen ózgeristerdi jariialap, aiyptalýshyǵa jańa baptar boiynsha aiyp taǵylǵanyn málimdedi, dep habarlaidy dalanews.kz.
Jańa aiyptar qosyldy
Memlekettik aiyptaýshynyń málimetinshe, Sultan Sársemálievke endi basqa qylmysty jasyrý maqsatynda adam óltirdi degen aiyp taǵylyp otyr. Tergeý nusqasyna sáikes, bul aiyp N. Óteshekalieva men M. Qarabalinniń qazasyna qatysty epizodtarǵa bailanysty engizilgen.
Sondai-aq aiyptalýshyǵa dármensiz kúidegi adamdy óltirdi degen bap qosyldy. Tergeý málimetinshe, densaýlyq jaǵdaiyna bailanysty ózin qorǵai almaǵan M. Qarabalina osy sanatqa jatqyzylǵan.
Internet-alaiaqtyq pen mal urlyǵy boiynsha da aiyp taǵyldy
Is materialdaryna internet-alaiaqtyq boiynsha jańa aiyp ta engizildi. Tergeý nusqasy boiynsha, jábirlenýshiler qaitys bolǵannan keiin aqparattyq júieler arqyly zańsyz túrde áleýmettik tólemder men zeinetaqylar rásimdelgen. Epizodtardyń biri boiynsha keltirilgen shyǵyn kólemi naqtylanyp, 520 996 teńge dep belgilengen.
Buǵan qosa, buǵan deiin mal satý kezindegi alaiaqtyq retinde saralanǵan epizod qaita qaralyp, endi «mal urlyǵy» baby boiynsha qaita dárejelendi.
Burynǵy aiyptar ózgerissiz qaldy
Sonymen qatar N. Muqanǵalievti qasaqana óltirý, jeke zattary men qujattaryn urlaý, qaza tapqandardyń múlkin iemdený jáne aqshalai qarajatty zańsyz ielený boiynsha buryn taǵylǵan aiyptar ózgerissiz qaldy.
