Saiysty qalalyq ákimdiktiń qoldaýymen «Astana daryny» daryndy balalar men talantty jastardy anyqtaý jáne qoldaý ortalyǵy men «Robotek.kz» robototehnika mektebi birlese otyryp uiymdastyrdy.
– Elordada robototehnikadan chempionat biyl ekinshi ret ótkizilýde. Chempionatty ótkizýdegi negizgi maqsat – Qazaqstanda injeneriia jáne robototehnika salalaryn damytý. Byltyr ótken saiys qalalyq deńgeide ǵana shektelse, biylǵy jyldyń ereksheligi chempionat respýblikalyq deńgeige kóteriledi. Ár óńirden iriktelgen myqty komandalar kelesi jyly baq synaidy. Sebebi balalardyń qyzyǵýshylyǵy erekshe, ári bul salaǵa suranys bar. Sondyqtan qatysýshy komandalarǵa sáttilik tileimi, – dedi «Astana daryny» daryndy balalar men talantty jastardy anyqtaý jáne qoldaý ortalyǵynyń basshysy Ǵajdenbek Tursynov óz sózinde.
Robottardy jobalaý, baǵdarlamalaý jáne tehnikalyq mamandyqtardy dáripteýge baǵyttalǵan chempionat úsh kúnge sozylady. Oǵan qatysýshy 10-17 jas aralyǵyndaǵy oqýshylar jas ereksheligine qarai «Robo-sýmo», «Kegelring-kvadro», «Syzyq boiymen jarys», «Biatlon», «Estafeta», «Labirint» atty 7 sanat boiynsha jarysady.
«Robotek.kz» mektebiniń direktory Sanjar Shalqarbekovtiń aitýynsha, robototehnikadan ótkiziletin jarystar elimizde kóp emes.
– Robototehnika – bir ýaqytta matematika, fizika, informatika pánderin biriktiretin biregei sala. Jahandaný dáýirinde «aqyldy» qurylǵylar damyp jatyr. Qytai, AQSh, Ońtústik Koreia elderinde robottar qoǵamnyń bir bólshegine ainalyp úlgerdi. Bizde bul úrdis jalǵasyn tabady degen senim bar. Bul salaǵa qyzyqqan balalar sany kóp. Sebebi robototehnikanyń bolashaǵy zor. Meńinshe, osy chempionatqa qatysyp otyrǵan oqýshylar ózderin jas injener-robototehnikter retinde kórsetýde, – dedi ol.
Al elordadaǵy №1 mektep-litseidiń besinshi synyp oqýshysy Daniial Sanat úshin atalmysh chempionat – robototehnikadan besinshi jarysy.
– Men ózimniń dosymmen saiysqa birge daiyndaǵan jobamyzdy ákeldim. Dosym baǵdarlamalaýmen ainalysady, al men qurastyramyn. Biz óz jumysymyzmen maqtanamyz. Óz basym robototehnikadan ótetin jarystardan qalmaýǵa tyrysamyn, – dedi Daniial.
Qalalyq týrdyń jeńimpazdary men júldegerleri 2023 jylǵy 4-5 mamyrda ótetin «Robotek Grand Tournament» respýblikalyq chempionatyna qatysady.
https://dalanews.kz/news/84399-elordada-zhengil-atletikadan-ashyq-biri
