Mektepke deiingi bes uiymnyń meńgerýshileri jáne olardyń kómekshileri búldirshinderdi tamaqtandyrýǵa arnalǵan qarajatty jymqyrǵany úshin kináli dep tanyldy, dep habarlaidy Dalanews.kz.
Qalalyq prokýratýranyń habarlaýynsha, burynǵy balabaqsha basshylary mázirge sáikes qajetti azyq-túlik kólemin kórsete otyryp ótinim bergen. Bul rette aldyn ala ónim berýshimen qylmystyq sóz bailasyp, olar tolyq jetkizilim týraly qujattarǵa jalǵan málimetter engizgen. Qylmystyq shemanyń bastamashysy jáne qylmystyq kelisimniń tikelei uiymdastyrýshysy buryn sottalǵan olardyń sybailasy (ónim berýshi) bolǵan.
Memlekettik aiyptaýshy sottalǵandardyń kinásin dáleldeitin barlyq aiǵaqtardy usynǵan.
"Sot úkimimen balabaqsha meńgerýshilerine taǵaiyndalǵan barlyq merzimge probatsiialyq baqylaý belgilene otyryp, 2 jyldan 3 jylǵa deiingi merzimge bas bostandyǵyn shekteýge, májbúrli eńbekke tartýǵa jáne memlekettik qyzmette qyzmet atqarýǵa ómir boiyna tyiym salýǵa sottaldy. Jeńildetetin mán-jailar retinde, meńgerýshilerdiń keltirilgen zalaldy ótegeni, kinálaryn tolyq moiyndaǵany jáne olardyń kishkentai balalarynyń bar ekendigi tanyldy", delingen habarlamada.
Sondai-aq uqsas qylmystar úshin ótelmegen sottylyǵy bolǵan olardyń sybailasy 4 jyl bas bostandyǵynan aiyryldy. Al, jymqyrǵan 35 mln teńgeden astam qarajattyń barlyǵy biýdjetke qaitaryldy.
Úkim zańdy kúshine endi.
