Astanada 33 jastaǵy bloger 15 táýlikke qamaýǵa alyndy, dep habarlaidy Dalanews.kz.
Tengrinews.kz málimetinshe, ol túngi klýbta anaiy suraqtar qoiyp, dóreki sózdermen túsirilgen arandatýshylyq videolar jariialap júrgen.
Er adam atalǵan mekemede art-direktor qyzmetin atqaryp, blog júrgizgen. Kórermen jinaýdy kózdegen ol kelýshi qyzdarǵa ádepsiz suraqtar qoiyp, ashyqtan-ashyq qorlap, beiádep sózder aitqan. Beinelerde tsenzýrasyz leksika qoldanylyp, onyń áreketi ainalasyndaǵylardy ádeiilep masqaralaý retinde baǵalanýy múmkin.
Áleýmettik jelide taraǵan bul videolar qoǵamda úlken narazylyq týdyrdy. Kópshilik blogerdiń qylyǵyn ádepsizdik pen adamdy syilamaýdyń úlgisi dep synap, ony jaýapqa tartýdy talap etti.
Politsiia ony ustap, sotqa jetkizdi. Sheshim boiynsha blogerge qoǵamdyq tártipti óreskel buzǵany, kópshilik aldynda beiádep sózder aitqany jáne qoǵamǵa qurmetsizdik kórsetkeni úshin 15 táýlik ákimshilik qamaý jazasy taǵaiyndaldy.
"Aiyppul tólep qutylýǵa múmkindik berińizshi", – dep sot otyrysynda jalyna suraǵanymen, blogerdiń ótinishi qanaǵattandyrylmady.
