Qazaqstan Parlamenti Senatynyń Tóraǵasy Máýlen Áshimbaev pen Ózbekstan Olıı Májilisi Senatynyń Tóraǵasy Tanzıla Narbaeva Astanada ótken qazaq-ózbek ǵylymı-shyǵarmashyl zıalylarynyń alǵashqy forýmynda sóz sóıledi. İs-shara T.Narbaevanyń Qazaqstanǵa resmı sapary aıasynda uıymdastyryldy. Forým barysynda eki eldegi ǵylymı jáne mádenı ortanyń ókilderi mádenı-gýmanıtarlyq yntymaqtastyqty nyǵaıtýǵa, halyqtyq dıplomatıany damytýǵa jáne dástúr sabaqtastyǵyn saqtaýǵa qatysty mańyzdy máselelerdi talqylady. Sondaı-aq olar birqatar baǵytta ózara baılanysty odan ári arttyrý jolyndaǵy basym mindetterdi belgiledi,- dep habarlaıdy Dalanews.kz
Máýlen Áshimbaev óz sózinde Qazaqstan men Ózbekstan zıalylarynyń alǵashqy forýmy Memleket basshysynyń tikeleı tapsyrmasymen ótkizilip jatqanyn aıtty. Prezıdent eki eldiń ǵylymı-shyǵarmashyl zıalylarynyń ózara baılanysyna únemi basa mán berip keledi. Osy oraıda bul alań baýyrlas halyqtardyń gýmanıtarlyq yntymaqtastyǵyn teredetýge jol ashatyn mańyzdy bastama ekeni anyq.
«Sońǵy jyldarda Qazaqstan Prezıdenti Qasym-Jomart Kemeluly Toqaev pen Ózbekstan Prezıdenti Shavkat Mıromonovıch Mırzıeevtiń basshylyǵymen qazaq-ózbek qarym-qatynasy buryn-sońdy bolmaǵan joǵary deńgeıge kóterildi. Bul rette mádenı-gýmanıtarlyq saladaǵy yntymaqtastyq basym baǵyttardyń biri ekenin atap ótken jón. Shyn máninde, mádenıet, óner, bilim degenimiz – eshqandaı saıasat salqyny buza almaıtyn myzǵymas kópirler. Olar qashanda ortaq tarıhqa, ózara qurmetke jáne qundylyqtarǵa taban tireıdi. Ǵylymı jáne shyǵarmashyl ortanyń búgingi kezdesýi aldaǵy ýaqytta tyń ıdeıalarmen, mańyzdy oılarmen jáne jańa josparlarmen almasatyn dástúrli alańǵa aınalady dep senemiz. Osyndaı ıgilikti is arqyly biz bir-birimizdiń únimizge qulaq asyp, ortaq jarqyn bolashaq jolynda mańyzdy qadam jasaımyz», – dedi Senat Spıkeri.
Sonymen qatar Máýlen Áshimbaev qazirgi jaǵdaıda Qazaqstan men Ózbekstan halyqtary arasyndaǵy dostyqty qalyptastyryp, nyǵaıtatyn adamı baılanystar da erekshe mánge ıe ekenin atap ótti. Bul rette jastar aıryqsha ról atqaratyny anyq. Sondyqtan bilim, ǵylym, mádenıet salalaryndaǵy ortaq baǵdarlamalardy keńeıtý, birlesken zertteýler júrgizip, tájirıbe almasý, kreatıvti jáne IT-jobalardy iske asyrý asa mańyzdy.
«Bizdiń elderimiz ǵylymǵa úlken kóńil bólip otyr. Bul – qýantarlyq jaıt. Byltyr Astanada ótken Ortalyq Azıa tarıhshylarynyń forýmy ortaq tarıhymyzdy kásibı turǵydan qaıta qaraýdyń qanshalyqty qajet ekenin aıqyn kórsetip berdi. Osyǵan baılanysty aldaǵy ýaqytta birlesken zertteýlerdi, muraǵattarǵa qol jetkizý jolyn jáne joǵary oqý oryndary arasyndaǵy ǵylymı baılanystardy damytý asa mańyzdy. Shyn máninde, bizdiń mádenıet, bilim, ǵylym salalaryndaǵy súrleýimizdi paralel emes, kerisinshe, ortaq jolǵa aınaldyrýǵa tolyq múmkindik bar», – dedi Qazaqstan Parlamenti Senatynyń Tóraǵasy.
Óz kezeginde Tanzıla Narbaeva Forýmda aıtylǵan ıdeıalarǵa qoldaý bildirip, ony ótkizýdiń ózekti ekenin jáne mundaı tyń bastamanyń mádenı-gýmanıtarlyq baılanystardy odan ári keńeıtýdegi erekshe mańyzyn atap ótti.
İrgeli is-sharada Qazaqstannyń Halyq jazýshysy Tólen Ábdik, Ózbekstan Kórkem akademıasynyń tóraǵasy Akmal Nýrıdınov, QR Prezıdenti janyndaǵy Qazaqstan Respýblıkasynyń Ulttyq ǵylym akademıasynyń prezıdenti Aqylbek Kúrishbaev, Ózbekstan Respýblıkasy Ǵylym akademıasynyń vıse-prezıdenti Bahrom Abdýhalımov, «Qazaq gazetteri» JSHS Bas dırektory Dıhan Qamzabekuly, Ózbekstan Jazýshylar odaǵynyń tóraǵasy Sırojıddın Saıdov, Qazaqstan Parlamenti Senatynyń depýtattary, ǵylymı jáne shyǵarmashyl zıaly qaýym men sarapshylar qaýymdastyǵynyń ókilderi sóz sóıledi. Olar qazaq-ózbek baılanysyn odan ári nyǵaıtýǵa arnalǵan jobalar men ıdeıalardy iske asyrý jóninde óz oılaryn aıtyp, usynystaryn jetkizdi.
Sondaı-aq búgin Ózbekstan Respýblıkasy Olıı Májilisi Senatynyń Tóraǵasy Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografıalyq saıasat jónindegi ulttyq komısıanyń múshelerimen kezdesti. Onda genderlik teńdik máseleleri keńinen talqylandy jáne qatysýshylar óńirdi ornyqty damytý jolynda áıelderdiń ekonomıkalyq múmkindikterin arttyrýǵa qatysty jobalar jóninde pikir almasyp, negizgi baǵyttar boıynsha birlesken bastamalar ázirledi. Tanzıla Narbaeva áıelderdiń múmkindikterin keńeıtý, genderlik teńdikti ınstıtýsıonaldyq turǵyda qoldaýdy nyǵaıtý jáne tájirıbe almasý máselelerin jan-jaqty talqylaýdyń mańyzdy ekenin tilge tıek etti.
