قازاقستان پارلامەنتى سەناتىنىڭ ءتوراعاسى ماۋلەن اشىمبايەۆ پەن وزبەكستان وليي ءماجىلىسى سەناتىنىڭ ءتوراعاسى تانزيلا ناربايەۆا استانادا وتكەن قازاق-وزبەك عىلىمي-شىعارماشىل زيالىلارىنىڭ العاشقى فورۋمىندا ءسوز سويلەدى. ءىس-شارا ت.ناربايەۆانىڭ قازاقستانعا رەسمي ساپارى اياسىندا ۇيىمداستىرىلدى. فورۋم بارىسىندا ەكى ەلدەگى عىلىمي جانە مادەني ورتانىڭ وكىلدەرى مادەني-گۋمانيتارلىق ىنتىماقتاستىقتى نىعايتۋعا، حالىقتىق ديپلوماتيانى دامىتۋعا جانە ءداستۇر ساباقتاستىعىن ساقتاۋعا قاتىستى ماڭىزدى ماسەلەلەردى تالقىلادى. سونداي-اق ولار ءبىرقاتار باعىتتا ءوزارا بايلانىستى ودان ءارى ارتتىرۋ جولىنداعى باسىم مىندەتتەردى بەلگىلەدى،- دەپ حابارلايدى Dalanews.kz
ماۋلەن اشىمبايەۆ ءوز سوزىندە قازاقستان مەن وزبەكستان زيالىلارىنىڭ العاشقى فورۋمى مەملەكەت باسشىسىنىڭ تىكەلەي تاپسىرماسىمەن وتكىزىلىپ جاتقانىن ايتتى. پرەزيدەنت ەكى ەلدىڭ عىلىمي-شىعارماشىل زيالىلارىنىڭ ءوزارا بايلانىسىنا ۇنەمى باسا ءمان بەرىپ كەلەدى. وسى ورايدا بۇل الاڭ باۋىرلاس حالىقتاردىڭ گۋمانيتارلىق ىنتىماقتاستىعىن تەرەدەتۋگە جول اشاتىن ماڭىزدى باستاما ەكەنى انىق.
«سوڭعى جىلداردا قازاقستان پرەزيدەنتى قاسىم-جومارت كەمەل ۇلى توقايەۆ پەن وزبەكستان پرەزيدەنتى شاۆكات ميرومونوۆيچ ميرزيەيەۆتىڭ باسشىلىعىمەن قازاق-وزبەك قارىم-قاتىناسى بۇرىن-سوڭدى بولماعان جوعارى دەڭگەيگە كوتەرىلدى. بۇل رەتتە مادەني-گۋمانيتارلىق سالاداعى ىنتىماقتاستىق باسىم باعىتتاردىڭ ءبىرى ەكەنىن اتاپ وتكەن ءجون. شىن مانىندە، مادەنيەت، ونەر، ءبىلىم دەگەنىمىز – ەشقانداي ساياسات سالقىنى بۇزا المايتىن مىزعىماس كوپىرلەر. ولار قاشاندا ورتاق تاريحقا، ءوزارا قۇرمەتكە جانە قۇندىلىقتارعا تابان تىرەيدى. عىلىمي جانە شىعارماشىل ورتانىڭ بۇگىنگى كەزدەسۋى الداعى ۋاقىتتا تىڭ يدەيالارمەن، ماڭىزدى ويلارمەن جانە جاڭا جوسپارلارمەن الماساتىن ءداستۇرلى الاڭعا اينالادى دەپ سەنەمىز. وسىنداي يگىلىكتى ءىس ارقىلى ءبىز ءبىر-بىرىمىزدىڭ ۇنىمىزگە قۇلاق اسىپ، ورتاق جارقىن بولاشاق جولىندا ماڭىزدى قادام جاسايمىز»، – دەدى سەنات سپيكەرى.
سونىمەن قاتار ماۋلەن اشىمبايەۆ قازىرگى جاعدايدا قازاقستان مەن وزبەكستان حالىقتارى اراسىنداعى دوستىقتى قالىپتاستىرىپ، نىعايتاتىن ادامي بايلانىستار دا ەرەكشە مانگە يە ەكەنىن اتاپ ءوتتى. بۇل رەتتە جاستار ايرىقشا ءرول اتقاراتىنى انىق. سوندىقتان ءبىلىم، عىلىم، مادەنيەت سالالارىنداعى ورتاق باعدارلامالاردى كەڭەيتۋ، بىرلەسكەن زەرتتەۋلەر جۇرگىزىپ، تاجىريبە الماسۋ، كرەاتيۆتى جانە IT-جوبالاردى ىسكە اسىرۋ اسا ماڭىزدى.
«ءبىزدىڭ ەلدەرىمىز عىلىمعا ۇلكەن كوڭىل ءبولىپ وتىر. بۇل – قۋانتارلىق جايت. بىلتىر استانادا وتكەن ورتالىق ازيا تاريحشىلارىنىڭ فورۋمى ورتاق تاريحىمىزدى كاسىبي تۇرعىدان قايتا قاراۋدىڭ قانشالىقتى قاجەت ەكەنىن ايقىن كورسەتىپ بەردى. وسىعان بايلانىستى الداعى ۋاقىتتا بىرلەسكەن زەرتتەۋلەردى، مۇراعاتتارعا قول جەتكىزۋ جولىن جانە جوعارى وقۋ ورىندارى اراسىنداعى عىلىمي بايلانىستاردى دامىتۋ اسا ماڭىزدى. شىن مانىندە، ءبىزدىڭ مادەنيەت، ءبىلىم، عىلىم سالالارىنداعى سۇرلەۋىمىزدى پاراللەل ەمەس، كەرىسىنشە، ورتاق جولعا اينالدىرۋعا تولىق مۇمكىندىك بار»، – دەدى قازاقستان پارلامەنتى سەناتىنىڭ ءتوراعاسى.
ءوز كەزەگىندە تانزيلا ناربايەۆا فورۋمدا ايتىلعان يدەيالارعا قولداۋ ءبىلدىرىپ، ونى وتكىزۋدىڭ وزەكتى ەكەنىن جانە مۇنداي تىڭ باستامانىڭ مادەني-گۋمانيتارلىق بايلانىستاردى ودان ءارى كەڭەيتۋدەگى ەرەكشە ماڭىزىن اتاپ ءوتتى.
ىرگەلى ءىس-شارادا قازاقستاننىڭ حالىق جازۋشىسى تولەن ابدىك، وزبەكستان كوركەم اكادەمياسىنىڭ ءتوراعاسى اكمال نۋريدينوۆ، ق ر پرەزيدەنتى جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ، وزبەكستان رەسپۋبليكاسى عىلىم اكادەمياسىنىڭ ۆيسە-پرەزيدەنتى باحروم ابدۋحاليموۆ، «قازاق گازەتتەرى» ج ش س باس ديرەكتورى ديحان قامزابەك ۇلى، وزبەكستان جازۋشىلار وداعىنىڭ ءتوراعاسى سيروجيددين سايدوۆ، قازاقستان پارلامەنتى سەناتىنىڭ دەپۋتاتتارى، عىلىمي جانە شىعارماشىل زيالى قاۋىم مەن ساراپشىلار قاۋىمداستىعىنىڭ وكىلدەرى ءسوز سويلەدى. ولار قازاق-وزبەك بايلانىسىن ودان ءارى نىعايتۋعا ارنالعان جوبالار مەن يدەيالاردى ىسكە اسىرۋ جونىندە ءوز ويلارىن ايتىپ، ۇسىنىستارىن جەتكىزدى.
سونداي-اق بۇگىن وزبەكستان رەسپۋبليكاسى وليي ءماجىلىسى سەناتىنىڭ ءتوراعاسى قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرىمەن كەزدەستى. وندا گەندەرلىك تەڭدىك ماسەلەلەرى كەڭىنەن تالقىلاندى جانە قاتىسۋشىلار ءوڭىردى ورنىقتى دامىتۋ جولىندا ايەلدەردىڭ ەكونوميكالىق مۇمكىندىكتەرىن ارتتىرۋعا قاتىستى جوبالار جونىندە پىكىر الماسىپ، نەگىزگى باعىتتار بويىنشا بىرلەسكەن باستامالار ازىرلەدى. تانزيلا ناربايەۆا ايەلدەردىڭ مۇمكىندىكتەرىن كەڭەيتۋ، گەندەرلىك تەڭدىكتى ينستيتۋسيونالدىق تۇرعىدا قولداۋدى نىعايتۋ جانە تاجىريبە الماسۋ ماسەلەلەرىن جان-جاقتى تالقىلاۋدىڭ ماڭىزدى ەكەنىن تىلگە تيەك ەتتى.
