Astanada kópbalaly otbasylarǵa beriletin járdemaqy basqa óńirlermen salystyrǵanda aitarlyqtai joǵary. Bul týraly Eńbek jáne halyqty áleýmettik qorǵaý ministri Svetlana Jaqypova málimdedi, dep habarlaidy Dalanews.kz.
"Mysal retinde aitaiyn: alty balasy bar otbasy Astanada bir toqsanda 2,7 mln teńge alsa, ózge aimaqtarda nebári 273 myń teńge alady. Sondyqtan qazirgi tańda bul sharalar qaita qaralyp jatyr. Maqsat – áleýmettik ádilettilikti qamtamasyz etý", – dedi ol dúisenbi kúni Úkimet kýlýarynda.
Ministr qazirdiń ózinde naqty sheshim qabyldanbaǵanyn aitty. Onyń sózinshe, barlyq nusqalar talqylanyp, kelisilgennen keiin ǵana bekitiledi.
"Biz jańa ǵana tapsyrma aldyq. Eńbek ministrligi ekonomikalyq jáne qarjylyq bloktardyń kelisiminsiz óz betinshe sheshim qabyldai almaidy", – dep túsindirdi Jaqypova.
Aita keteiik, Qasym-Jomart Toqaev halyqqa Joldaýynda elordada áleýmettik qoldaý men jeńildikterdiń kóp bolǵandyqtan, halyqtyń Astanaǵa aǵylatynyn atap ótken edi. Prezident bul teńsizdikti azaitý úshin óńirlerdegi áleýmettik mindettemelerdi qarjylandyrýdy qaita bólý qajettigin aitqan.
