Elordada jyl basynan beri 19 stalking faktisi tirkeldi, dep Dala news habarlaidy.
Politsiia departamentiniń málimetinshe, tirkelgen 19 istiń altaýy otbasylyq-turmystyq qatynastar salasynda bolǵan. Qaralǵan isterdiń biri boiynsha sot 80 saǵat qoǵamdyq jumys túrindegi jaza taǵaiyndaǵan.
Aita keteiik, Qylmystyq kodekske 115-1-bap «Stalking» ótken jyldyń shildesinde «Zań jáne tártip» tujyrymdamasy aiasynda engizilgen. Bul bap adamnyń erkinen tys oǵan qaita-qaita bailanysqa shyǵý, ańdý, mazasyn alý siiaqty áreketter úshin qylmystyq jaýapkershilik qarastyrady.
Stalkingke júieli qońyraýlar men habarlamalar jiberý, ańdý, baqylaý ornatý, jeke aqparatty taratý jáne jábirlenýshide qorqynysh pen qaýipsizdik seziminiń joǵalýyna ákeletin ózge de qysym túrleri jatady.
Zańǵa sáikes, stalking úshin 200 ailyq eseptik kórsetkishke deiin aiyppul, 200 saǵatqa deiin qoǵamdyq jumys nemese 50 táýlikke deiin qamaý jazasy kózdelgen. Eger áreket kúsh qoldanýmen nemese qoqan-loqqymen qatar júrse, is qosymsha basqa baptar boiynsha saralanady.
Politsiia ókilderi qylmystyq jaýapkershilik naqty ziian keltirilgen jaǵdaida – jeke ómirge qol suǵý, erkin júrip-turýdy shekteý nemese psihologiialyq ziian týyndaǵan kezde bastalatynyn atap ótti.
Quqyq qorǵaý organdary azamattarǵa qýdalaýǵa tap bolǵan jaǵdaida dálelderdi saqtaýǵa, qýdalaýshymen bailanysqa túspeýge jáne der kezinde politsiiaǵa júginýge keńes beredi.
