Búgin QR Mádeniet jáne aqparat ministri Aida Balaeva Euronews direktorlar keńesiniń tóraǵasy Pedro Vargas Davidpen kezdesti. Kezdesý barysynda taraptar Qazaqstannyń Euronews-pen yntymaqtastyǵy týraly memorandýmǵa qol qoidy.
«Euronews óńirlik ókildiginiń ashylýy – arnanyń halyqaralyq aýditoriiaǵa Qazaqstannyń ekonomikalyq, saiasi, áleýmettik jáne mádeni damýyn jan-jaqty nasihattaýyna úlken múmkindik beredi», - dep atap ótti ministr.
Euronews óńirlik ókildiginiń ashylýy qazaqstandyq jýrnalisterge kóp múmkindik syilaidy. Kezdesý barysynda otandyq telearna qyzmetkerleriniń biliktiligin arttyrýǵa arnalǵan oqytý treningteri men sheberlik synyptaryn ótkizý máselesi talqylandy. Bul qazaqstandyq BAQ ókilderiniń kásibi biliktiligin arttyrýǵa septigin tigizedi.
«Talqylaý ári memorandýmǵa qol qoiý qysqa ýaqytta jasaldy, bul eki taraptyń da jemisti yntymaqtastyqqa múddeli ekendigin jáne onyń mańyzyn aiqyndaidy. Biz úshin qazaqstandyq jýrnalisterdi jan-jaqty qoldaý mańyzdy. Biz ortaq jumys úshin eýropalyq jýrnalisterdi Qazaqstanǵa ákelip qana qoimai, qazaqstandyq BAQ arasynda jańa tulǵalardy, talantty jastardy izdeitin bolamyz», – dedi Pedro Vargas Devid.
Mádeniet jáne aqparat ministri Qazaqstanda kásibi ári myqty redaktsiia qurý úshin barlyq múmkindikter bar ekenin sóz etti.
«Búgin tarihi kún. Qazaqstanda Euronews keńsesiniń ashylýy el úshin mańyzdy kezeńderdiń biri. Qazaqstannyń halyqaralyq arenadaǵy media keńistikte óz orynyn tabýǵa kómektesetin mańyzdy jobanyń bir bóligi bolý – biz úshin úlken mártebe», - dep atap ótti Qazaqstandaǵy Euronews jobasynyń resmi ókili Ásel Qojaqova.
Budan ári taraptar mediany damytýǵa jáne halyqaralyq aqparat almasýdy nyǵaitýǵa baǵyttalǵan birlesken jobalar men bastamalardy júzege asyryp, ózara yntymaqtastyq ornatýǵa múddeli ekenin jetkizdi.
QR Mádeniet jáne aqparat ministrliginiń baspasóz qyzmeti
