Astanada 13 naýryz kúni respýblıkalyq «JORYQ» at sporty federasıasy men Astana qalasy Ulttyq jáne olımpıadalyq at sporty túrleri federasıasy arasynda Memorandýmǵa qol qoıyldy.

Qujatqa respýblıkalyq «JORYQ» at sporty federasıasynyń prezıdenti Baqytjan Turlybekov pen Astana qalasy Ulttyq jáne olımpıadalyq at sporty túrleri federasıasynyń prezıdenti Erlan Kanalımov qol qoıdy.

14 tarmaqtan turatyn Memorandým eki federasıa arasyndaǵy áriptestikti, yntymaqtastyqty nyǵaıtýdy jáne at sportyn damytý men tanymaldyǵyn arttyrýdy kózdeıdi.

Atap aıtqanda, taraptar birlese otyryp at sportyn tıimdi damytýǵa baǵyttalǵan bastamalaryna qoldaý kórsetýge, Qostanaı jáne Adaı jylqylarynyń tuqymyn,jylqy malynyń qolǵa alǵash úıretilgen Botaı mádenıetin nasıhattaý barysynda birlesken jumys júrgiýge ýaǵdalasty.

Taraptar Astana qalasynyń shaǵyn saıabaqtarynyń birinde Botaı jylqysyna eskertkish ornatý jáne qoǵamdyq keńistikti sol taqyrypta abattandyrý men Astana qalasynda ashyq aspan astynda Botaı mádenıetiniń murajaıyn uıymdastyrý boıynsha birlesip jumys atqarýdy da josparlap otyr.

Sonymen qatar, eki federasıa at sportyna úles qosqan azamattardy jyl saıyn qoshemetteý jáne marapattaý saltanatty sharasyn uıymdastyryp, joǵary oqý oryndarymen birlesken sharalar ótkizbekshi.

Buǵan qosa qazaq jylqysyn, onyń qazaq turmysy men mádenıetindegi ornyn  nasıhattaý jolynda Astana qalasyndaǵy Jastar teatrynda arnaıy qoıylym kórsetý boıynsha birlesken jumys ta qolǵa alynbaq.