11 qazan kúni Astana qalasy "Qazmedıa ortalyǵynda" Bas redaktorlar klýbynyń qoldaýymen belgili jýrnalıs, aqyn, jazýshy Azamat Ábilqaıyrdyń "Bekzat Sattarhanov kim?" balalar jáne jasóspirimderge arnalǵan kitabynyń tusaýkeseri ótti, dep habarlaıdy Dalanews.kz.
Oqyrmanǵa jol tartyp otyrǵan bul kitap balalar ádebıetiniń damýyna óz úlesin qosady. Kitapta Sıdneıde ótken Olımpıada chempıony Bekzat Sattarhanovtyń ómiri men álemge tanymal sportshy bolǵanǵa deıingi kásibı joly jazylǵan. Kitaptaǵy oqıǵalar boksshynyń ata-anasy men zamandastarynyń esteliginen alynǵan.
Kitap avtory Azamat Ábilqaıyrdyń aıtýynsha, kitap jazý prosesi bir aıǵa sozylǵan. Oǵan deıin zertteý jumystary basymyraq bolǵan. Boksynyń anasy Syrlykúl Sattarhanova kitaptyń qoljazbasyn birneshe ret oqyp, óz pikirlerin aıtyp otyrǵan.
"Bul kitapta boksshynyń qyzyqty da qıyn ómir joly, qyzyqty sátteri, sanaly ǵumyryn qazaq boks stılin qalyptastyrýǵa zor úles qosqany, el úshin sińirgen ereń eńbegi dáripteledi", - dedi kitap avtory.
Kitaptyń tusaýkeserine arnalǵan is-sharaǵa boksshynyń anasy, QR Parlamenti Senatynyń depýtaty, Bas redaktorlar klýbynyń basshysy Bıbigúl Jeksenbaı, QR Parlamenti Senatynyń depýtaty Darhan Qydyráli, QR Parlamenti Májilisiniń depýtaty Nartaı Aralbaıuly, "Habar" agenttigi" AQ Basqarma Tóraǵasy Kemelbek Oıshybaev, "Qazaqstan" RTRK Basqarma tóraǵasynyń orynbasary Azamat Keńesuly, "ABAI" telearnasynyń dırektory Erkin Muhamedjanov,"Túrkistan" halyqaralyq gazetiniń bas redaktory Baýyrjan Babajanuly, qoǵam jáne mádenıet qaıratkerleri, medıa sarapshylar men sport jýrnalıseri, elimizdiń belgili aqyn-jazýshylary qatysty.
"Bul kitap bizdiń óskeleń urpaqqa úlgi-ónege. Jastar Bekzattaı bolsa jaman bolmas dep oılaımyn. Tárbıesi, júregi Bekzattaı bolsa jaman bolmas", - dedi kezdesý barysynda sóz alǵan Syrlykúl Sattarhanova
QR Parlamenti Senatynyń depýtaty Darhan Qydyráli balalar men jasóspirimder aýdıtorıasyna arnaıy jazylǵan "Bekzat sattarhanov kim?" kitaby qazaq balalar ádebıetinde óziniń ornyn tabaryna senim bildirdi.
Jınalǵan qaýym qalamgerdi jańa kitabynyń jaryqqa shyǵýymen quttyqtap, jyly lebizderin bildirdi.
