11 قازان كۇنى استانا قالاسى "قازمەديا ورتالىعىندا" باس رەداكتورلار كلۋبىنىڭ قولداۋىمەن بەلگىلى جۋرناليست، اقىن، جازۋشى ازامات ءابىلقايىردىڭ "بەكزات ساتتارحانوۆ كىم؟" بالالار جانە جاسوسپىرىمدەرگە ارنالعان كىتابىنىڭ تۇساۋكەسەرى ءوتتى، دەپ حابارلايدى Dalanews.kz.
وقىرمانعا جول تارتىپ وتىرعان بۇل كىتاپ بالالار ادەبيەتىنىڭ دامۋىنا ءوز ۇلەسىن قوسادى. كءىتاپتا سيدنەيدە وتكەن وليمپيادا چەمپيونى بەكزات ساتتارحانوۆتىڭ ءومىرى مەن الەمگە تانىمال سپورتشى بولعانعا دەيىنگى كاسىبي جولى جازىلعان. كىتاپتاعى وقيعالار بوكسشىنىڭ اتا-اناسى مەن زامانداستارىنىڭ ەستەلىگىنەن الىنعان.
كىتاپ اۆتورى ازامات ءابىلقايىردىڭ ايتۋىنشا، كىتاپ جازۋ پروسەسى ءبىر ايعا سوزىلعان. وعان دەيىن زەرتتەۋ جۇمىستارى باسىمىراق بولعان. بوكسىنىڭ اناسى سىرلىكۇل ساتتارحانوۆا كىتاپتىڭ قولجازباسىن بىرنەشە رەت وقىپ، ءوز پىكىرلەرىن ايتىپ وتىرعان.
"بۇل كىتاپتا بوكسشىنىڭ قىزىقتى دا قيىن ءومىر جولى، قىزىقتى ساتتەرى، سانالى عۇمىرىن قازاق بوكس ءستيلىن قالىپتاستىرۋعا زور ۇلەس قوسقانى، ەل ءۇشىن سىڭىرگەن ەرەڭ ەڭبەگى دارىپتەلەدى"، - دەدى كىتاپ اۆتورى.
كىتاپتىڭ تۇساۋكەسەرىنە ارنالعان ءىس-شاراعا بوكسشىنىڭ اناسى، ق ر پارلامەنتى سەناتىنىڭ دەپۋتاتى، باس رەداكتورلار كلۋبىنىڭ باسشىسى بيبىگۇل جەكسەنباي، ق ر پارلامەنتى سەناتىنىڭ دەپۋتاتى دارحان ءقىدىرالى، ق ر پارلامەنتى ءماجىلىسىنىڭ دەپۋتاتى نارتاي ارالباي ۇلى، "حابار" اگەنتتىگى" اق باسقارما ءتوراعاسى كەمەلبەك ويشىبايەۆ، "قازاقستان" رترك باسقارما ءتوراعاسىنىڭ ورىنباسارى ازامات كەڭەس ۇلى، "ABAI" تەلەارناسىنىڭ ديرەكتورى ەركىن مۇحامەدجانوۆ،"تۇركىستان" حالىقارالىق گازەتىنىڭ باس رەداكتورى باۋىرجان باباجان ۇلى، قوعام جانە مادەنيەت قايراتكەرلەرى، مەديا ساراپشىلار مەن سپورت جۋرناليستەرى، ەلىمىزدىڭ بەلگىلى اقىن-جازۋشىلارى قاتىستى.
"بۇل كىتاپ ءبىزدىڭ وسكەلەڭ ۇرپاققا ۇلگى-ونەگە. جاستار بەكزاتتاي بولسا جامان بولماس دەپ ويلايمىن. تاربيەسى، جۇرەگى بەكزاتتاي بولسا جامان بولماس"، - دەدى كەزدەسۋ بارىسىندا ءسوز العان سىرلىكۇل ساتتارحانوۆا
ق ر پارلامەنتى سەناتىنىڭ دەپۋتاتى دارحان ءقىدىرالى بالالار مەن جاسوسپىرىمدەر اۋديتورياسىنا ارنايى جازىلعان "بەكزات ساتتارحانوۆ كىم؟" كىتابى قازاق بالالار ادەبيەتىندە ءوزىنىڭ ورنىن تابارىنا سەنىم ءبىلدىردى.
جينالعان قاۋىم قالامگەردى جاڭا كىتابىنىڭ جارىققا شىعۋىمەن قۇتتىقتاپ، جىلى لەبىزدەرىن ءبىلدىردى.
