Astanada qoǵamdyq kólikte tártip buzǵan er adam ákimshilik jaýapkershilikke tartyldy, dep habarlaidy dalanews.kz.
Qalalyq Politsiia departamentiniń habarlaýynsha, áleýmettik jelilerge júrgizilgen monitoring barysynda avtobýstaǵy jolaýshylardyń mazasyn alǵan azamattyń videosy anyqtalǵan. Kadrlarda er adamnyń telefonmen sóilesý kezinde balaǵat sózder aityp, ainalasyndaǵylarǵa agressivti minez kórsetkeni baiqalady.
Tekserý nátijesinde politsiia qyzmetkerleri 51 jastaǵy azamattyń jeke basyn anyqtap, ony Almaty aýdandyq politsiia basqarmasyna jetkizgen.
Quqyq buzýshyǵa qatysty usaq buzaqylyq faktisi boiynsha ákimshilik hattama toltyrylyp, is sotqa joldanǵan. Sot sheshimimen er adam 15 táýlikke ákimshilik qamaýǵa alyndy.
Politsiia qoǵamdyq oryndarda tártip saqtaý ár azamattyń mindeti ekenin eske salyp, turǵyndardy ózara syilastyq tanytyp, qoǵamdyq tártipti buzatyn áreketterden aýlaq bolýǵa shaqyrdy.
