Áskerge shaqyrylýshylar aldynda Qazaqstan Respýblıkasy Qorǵanys mınıstriniń orynbasary, general-leıtenant Sultan Kamaletdınov, Astana ákiminiń orynbasary Eset Baıken, «Qarýly Kúshterdiń ardagerleri» RQB basshylyǵy, «Jas sarbaz» balalar-jasóspirimder áskerı-patrıottyq qozǵalysynyń generaldary men ofıserleri, áskerı kolej ulandary jáne garnızon áskerı bólimderiniń merzimdi áskerı qyzmetiniń áskerı qyzmetshileri sóz sóıledi.
«Otan aldynda azamattyq borysh óteý – úlken mártebe. Búgingi tańda elordada jasóspirimder arasynda áskerı-patrıottyq tárbıe boıynsha júıeli jumys júrip jatyr. Qorǵanys isteri departamentimen birlesip shaqyrý naýqany jáne salalyq baǵyttaǵy basqa da is-sharalar ótkiziledi. Bıyl Astanadan Qarýly Kúshter qataryna 100-den astam jas jaýynger attandy. Jaqynda áskerı jıyndardy ótkizý úshin jańa keshendi ǵımarat paıdalanýǵa berildi. Sondaı-aq, shaıqastarǵa qatysqan ardagerler uıymdary, «Jas sarbaz» áskerı-patrıottyq klýbtary is-sharalardy qoǵamdyq negizde uıymdastyrady. Qala mektepterinde áskerı daıyndyqtyń birinshi kýrsy oqytylady. Búgingi is-sharany biz dástúrge aınaldyramyz. Óıtkeni, árbir jasóspirim Otandy qorǵaýdyń qasıetti paryz ekenin bilýi kerek», – dedi Astana ákiminiń orynbasary Eset Baıken.
«Búgingi áskerı-patrıottyq is-sharada biz kolejder men ýnıversıtetterdiń stýdentterine kóptegen tehnıka, qarý-jaraq, kıim úlgisin usynǵymyz keledi. Biz olardy armıa ómirimen tanystyramyz jáne armıadaǵy qyzmet týraly málimetter beremiz. Budan basqa, Búgin Astanadan áskerge shaqyrylýshylardyń kezekti komandasy belgilendi. Elordalyq balalar desanttyq-shabýyl bólimderinde qyzmet etetin bolady. Olarǵa jaqsy qyzmet, al jas urpaqqa aldaǵy qyzmetke daıyn bolýyn tileımiz!» – dedi elordanyń qorǵanys isteri departamentiniń ókili Ǵanı Artyqov.
Ol sondaı-aq is-shara úsh kezeńnen turatynyn aıtty. Bul áskerı tehnıkamen jáne qarý-jaraqpen tanysý, bolashaq sarbazdarǵa beriletin tapsyrmalar, sondaı-aq áskerı konsert.
İs-sharaǵa elordalyq mektepterdiń oqýshylary, kolejder men áskerı kafedralardyń stýdentteri qatysty.
KAZGÚÝ áskerı kafedrasynyń stýdenti Darhan Kóshimurat Otan aldyndaǵy áskerı boryshyn oryndaý qasıetti is dep sanaıtynyn aıtyp ótti.
«Bizdiń ýnıversıtette áskerı kafedra bar, onda tórt mamandyq oqytylady: tárbıe jumysyn uıymdastyrý, aýmaqtyq qorǵanysty uıymdastyrý, áskerı zańger jáne psıholog. Men áskerı psıholog retinde oqımyn jáne kafedrany bitirgennen keıin «zapastaǵy leıtenant» mamandyǵyn alamyn. Búgingi is-shara bolashaq Otan qorǵaýshylar úshin óte mańyzdy. Ol jastardyń boıynda patrıottyq rýhty tárbıeleıdi jáne áskerı qyzmettiń ımıjin aıtarlyqtaı arttyrady. Sondaı-aq bizge bolashaqta áskerı salada qalaı damı alatynymyz aıtylady», – dedi stýdent.
Sondaı-aq, fılarmonıa ǵımaratynyń aldyndaǵy alańda áskerı tehnıka men qarý-jaraq kórmesi uıymdastyryldy, onda «Kobra», «Arlan» bronetransporterleri, mınadan tazartý mashınasy, BTR-80, kvadrasıklder, mınometter, sondaı-aq atys qarýynyń úlgileri usynyldy.
Esterińizge sala keteıik, 1 naýryzdan bastap elimizde merzimdi áskerı qyzmetke shaqyrý bastaldy. Ásker qataryna qosylý úshin áskerge shaqyrylǵandardyń densaýlyǵy jaqsy jáne psıhologıalyq turǵydan myǵym bolýy kerek. Dál osy qasıet áskerde ózin shynyqtyrýǵa múmkindik beredi.
