Elordadaǵy Beibitshilik jáne kelisim saraiynda Álemdik jáne dástúrli dinder kóshbasshylarynyń VIII Sezi qarsańynda "Týrin Kebini" jáne "Qasietti kitaptar" atty eki biregei halyqaralyq kórme óz esigin ashty. Qos kórmeniń negizgi maqsaty - qoǵamdaǵy dinaralyq kelisimdi nyǵaitý, túrli konfessiialardyń rýhani murasyn keńinen tanytý, dep habarlaidy Dalanews.kz.
Kórmeniń ashylý rásiminde sóz alǵan QR Mádeniet jáne aqparat ministri Aida Balaeva usynylǵan jádigerlerdiń tek tarih emes, búkil adamzattyń rýhani qundylyqtary men mádeni sabaqtastyǵynyń kýási ekenin atap ótti.
"Osyndai erekshe jádigerler arqyly biz ózara túsinistikke, rýhani úndestikke jáne mádeni dialogqa negizdelgen ortaq bolashaqty qalyptastyramyz. Prezident Qasym-Jomart Toqaev aitqandai, Quran, Injil, Táýrat sekildi rýhani kitaptar árdaiym gýmanizm men beibitshilikti nasihattaǵan. Bul kórme Qazaqstannyń gýmanizm, kelisim men rýhani úilesimdilikti ustanatynyn taǵy bir márte dáleldeidi", – dedi ministr.
Qazaqstandaǵy Apostol Nýntsiii, Arhiepiskop Georg Panamthýndila kórmeniń dinaralyq dialogty tereńdetýdegi mańyzyna erekshe toqtalyp, Qazaqstan Prezidenti Qasym-Jomart Toqaevqa alǵysyn bildirdi:
"Mundai kórmeniń Qazaqstanda ótýi kezdeisoq emes. Sebebi sizderdiń elderińiz dini tatýlyq pen kelisimdi joǵary baǵalaidy. Osy bir mańyzdy is-sharaǵa qoldaý bildirgeni úshin Qazaqstan Prezidentine shynaiy rizashylyǵymdy jetkizemin".
Al Astanadaǵy Áýlie Mariia Rim-katolik arhieparhiiasynyń Arhiepiskop-metropoliti Tomash Bernard Peta Qazaqstannyń dini senim bostandyǵyn ustanǵan, túrli konfessiialarǵa qurmetpen qaraityn el retinde tanymal ekendigin atap ótti:
"Bul kórmeniń sátti ótýi – Qazaqstan halqynyń rýhaniiatyna qosylǵan zor úles. Máńgilik qundylyqtarǵa negizdelgen beibit damý jolyn tańdaǵan elderińizge Allanyń berekesi bolsyn".
Qazaqstan Pravoslav shirkeýiniń basshysy, Astana jáne Qazaqstan mitropoliti Aleksandr "Týrin Kebini" kórmesiniń hristian álemi úshin airyqsha mánge ie ekenine toqtaldy:
"Týrin Kebini" – ǵasyrlar boiy ǵalymdar men senýshilerdiń qyzyǵýshylyǵyn týdyrǵan baǵa jetpes jádiger. Bul kebindi "besinshi Injil" dep te ataidy. Osyndai erekshe kórmeniń Qazaqstanda ashylýy – biz úshin úlken abyroi".
"Kirche in Not" qorynyń atqarýshy prezidenti Redjina Linch óz kezeginde jádigerdiń ǵylymi mańyzyn erekshe atap ótti:
"Týrin Kebini – hristian álemindegi eń kóp zerttelgen qundylyqtardyń biri. Kebinniń kórmesin Qazaqstanǵa ákelý – biz úshin úlken qurmet".
Ekspozitsiiaǵa "Týrin Kebininiń" túpnusqasynan dálme-dál kóshirmesi, 27 aqparattyq panel, sondai-aq tarihi artefaktiler, beinematerialdar jáne illiýstratsiialyq broshiýralar qoiylǵan. Ańyzǵa sáikes, bul kebinmen eki myń jyl buryn shegege qaǵylyp, aiqyshta qaitys bolǵan Isa Másihtiń denesin oraǵan desedi.
Al "Qasietti kitaptar" kórmesinde túrli dinderdiń negizgi jazbalary qoiylǵan. Kórmede usynylǵan 50-den astam jádigerdiń ishinde VII ǵasyrdaǵy Qurannyń kóne qoljazbasy, XIX ǵasyrda jaryq kórgen sirek Injilder, Kenesary hannyń jeke Quran kitaby, Talmýd, Tora jáne basqa da tarihi mańyzdy dini jazbalar bar.
Qos kórme 2025 jyldyń 25 qyrkúiegine deiin jalǵasady. Kelýshiler munda túrli dini dástúrlerdiń rýhani muralarymen jaqyn tanysyp, adamzat tarihyndaǵy kieli kitaptardyń mádeni-rýhani mańyzyn tereńirek túsinýge múmkindik aldy.
