Astanadaǵy turǵyn úi keshenderiniń birinde lift ishinde bes jasar balaǵa pyshaqpen shabýyl jasaǵan 14 jastaǵy jasóspirimge qandai jaza qoldanylatyny belgili boldy, dep habarlaidy Dalanews.kz.
Astana qalasy Politsiia departamentiniń Nura aýdandyq basqarmasy Tengrinews.kz redaktsiiasynyń resmi suraýyna jaýap bere otyryp, atalǵan oqiǵa boiynsha Qylmystyq kodekstiń 293-babynyń 3-bóligi («Densaýlyqqa ziian keltirýge arnaiy beiimdelgen zatty qoldanyp, kúsh qoldaný arqyly jasalǵan buzaqylyq») boiynsha sotqa deiingi tergeý bastalǵanyn málimdedi.
Atalǵan baptyń sanktsiiasy bes jyldan jeti jylǵa deiingi merzimge bas bostandyǵynan aiyrý jazasyn qarastyrady.
“Buzaqylyq, eger ol qarý nemese densaýlyqqa ziian keltirýge arnaiy beiimdelgen zattardy (atys qarýy, gazdy qarý, pyshaq, kastet jáne basqa da sýyq qarý túrleri) qoldaný nemese qoldanýǵa umtylý arqyly jasalsa, sondai-aq qylmystyq toptyń qatysýymen oryn alsa, kináli tulǵa bes jyldan jeti jylǵa deiin bas bostandyǵynan aiyrý jazasyna kesiledi”, – dep málimdedi politsiia ókilderi.
Eske salaiyq, 11 aqpanda Qazaqstan jurtshylyǵyn dúr silkindirgen oqiǵa oryn aldy. 14 jastaǵy jasóspirim Astanadaǵy turǵyn úilerdiń birinde lift ishinde bes jasar balaǵa pyshaqpen shabýyl jasady. Oqiǵanyń beinejazbasy áleýmettik jelilerde tarap, kópshiliktiń qyzý talqysyna tústi.
