Astana–Pavlodar avtojolynyń bir bóliginde kúnniń kúrt ysýyna bailanysty tsementbeton jabyndysy kóterilip, birneshe kólikke zaqym kelgen, dep habarlaidy dalanews.kz.
Keiingi kúnderi aýa temperatýrasynyń aitarlyqtai joǵarylaýyna bailanysty joldyń tsementbeton jabyndysyna kúsheitilgen baqylaý júrgizilgen. Josparly patrýldeý barysynda mamandar jabynnyń kóterilý qaýpi bar eki ýchaskeni anyqtap, 31 mamyrdan bastap aldyn alý jumystaryn bastaǵan.
Alaida 1 maýsym kúni saǵat 13:30 shamasynda kezekti tekserý kezinde Astana baǵytyna qarai júretin joldyń 1356-shaqyrymynda tsementbeton jabynynyń kóterilgeni tirkeldi.
Oqiǵa anyqtalǵannan keiin atalǵan ýchaskede ýaqytsha jol belgileri ornatylyp, jol qyzmetkerleri jóndeý jumystaryna kirisken. Qazirgi ýaqytta búlingen beton jabyndysyn bólshekteý jáne qozǵalys qaýipsizdigin qalpyna keltirý jumystary júrgizilip jatyr.
Ulttyq kompaniia málimetinshe, turaqty monitoring pen patrýldeý qaýipti ýchaskelerdi der kezinde anyqtap, joldaǵy tótenshe jaǵdailardyń aldyn alýǵa múmkindik beredi.
Kompaniia júrgizýshilerdi jóndeý jumystary júrip jatqan aýmaqtarda erekshe saq bolýǵa, ýaqytsha jol belgileriniń talaptaryn oryndaýǵa jáne belgilengen jyldamdyq rejimin saqtaýǵa shaqyrdy.
