Tergeý materialdarynda aiyptalýshylar biýdjetke jalpy kólemi 6 milliard teńgege jýyq shyǵyn keltirgen. Olar qyrýar qarjyny túrli jolmen jymqyrǵany málim boldy.
Qurylysy osydan segiz jyl buryn bastalǵan bas qaladaǵy jeńil relsti kólik jobasyna qatysty sot protsesi endi ǵana bastaldy. Buǵan deiin tergeý málimetterinde bul iske 11 adamnyń qatysty bar ekeni aitylǵan-dy.
Biraq búgin bastalǵan sot otyrysynda 9 adamnyń aty-jóni aityldy. Olardyń biýdjetke keltirgen shyǵynynyń naqty kólemin aitsaq, ol – 5 833 300 827 teńge.
Koronavirýstan saqtyq sharasy retinde alǵashqy sot jiyny onlain tártibimen ótti. Qylmystyq toptyń 9 múshesiniń jeteýi sotqa qashyqtan qatysty. Olar qalanyń burynǵy kólik basqarmasynyń basshysy Rashid Amanjolov, qalalyq máslihattyń burynǵy depýtaty ári hatshysy Janat Nurpeiisov, Astana Innovations AQ-nyń burynǵy basshysy men taǵy birqatar merdiger uiym ókilderi bar.
Al bar bylyqtyń basynda turǵan qala ákiminiń burynǵy orynbasary Qanat Sultanbenkov pen sol ýaqyt Astana LRT-ny basqarǵan Talǵat Ardan shetelge qashyp ketken.
Prokýrordyń aitýynsha, 2012 jyly Úkimet sheshimimen aýqymdy qurylystyń alǵashqy kezeńi bastalady. Ol áýejai men Ábý Dabi plazanyń arasyndaǵy 15 shaqyrymdy jalǵaýy tiis bolǵan. «Tap sol qurylys bastalar shaqta Sultanbekovtiń oiy buzylǵan» deidi prokýror.
– Sultanbekov qara basyn baiytý maqsatymen qylmys josparyn qurady. Oiǵa alǵan jymysqy árekettiń aýqymy úlken ekenin eskerip, onysyn sátti júzege asyrý úshin qylmystyq top qurady. Oǵan «Astana LRT» basshysy Talǵat Ardan men qalalyq kólik basqarmasynyń basshysy Rashid Amanjolovty tartylǵan. Olar onyń tapsyrmasyn buljytpai oryndap otyrýǵa kelisimin bergen, – deidi protsessýaldyq prokýror Jangeldi Esebaev.
Prokýrordyń aitýynsha, qylmystyq top músheleri bir-birimen etene tanys bolmaǵan. Olardy biriktirgen bir ǵana nárse bolypty – qarjysy kóp jobadan qalaida jyrymshylap aqsha jeý. Iaǵni, smetalyq qujat jasaý, tehnikalyq baqylaý, memlekettik satyp syndy jumystar bir jerde artyǵymen baǵalanǵan.
– Uiymdasqan qylmystyq toptyń belsendi múshesi ári uiymdastyrýshylarynyń biri bola otyryp, Ardan 2012 jyldyń sońynda qatarlaryna dosy Dáýren Ábdihamitovty tartady. Istiń mán-jaiyn tolyq túsinip otyrsa da ol baiyǵysy kelip, qylmystyq áreketke qatysýǵa kelisedi. Al Sultanbekov qylmystyq top múshelerine árqaisynyń qyzmet laýazymyna qarai jasaityn áreketterin bólip berip otyrǵan, – dedi prokýror Jangeldi Esebaev.
Top músheleri jasaqtalyp bolǵan soń Talǵat Ardan memlekettik satyp alýdan aqsha jasaýǵa kirisedi. Iaǵni, jalǵan básekelestik orta jasap, tenderde ylǵi ózderine qarasty merdigerge utqyzǵan.
Sodan keiin merdigermen memlekettik satyp alý baǵasyn áldeqaida artyryp, túrli kelisim-sharttar jasaǵan. Prokýrordyń baiandamasyndaǵy san túrli qylmystyq árekettiń bul bir ǵana parasy eken.
Búgingi sot barysynda bárinen de prokýrorǵa aýyr tidi. Qylmystyq istiń jyldar boiy qordalanǵan shemasyn tolyq ashyp aityp berý úshin azannan bastap keshki beske deiin oqyp berýine týra keldi. Bul aýqymdy sot protsesiniń basy ǵana. Shyǵyny orasan jobany, áý basta Úkimet eldiń imidji úshin dep bekitken. Saqaldy qurylysqa ainalǵan jobanyń iesi bul aralyqta ataýyn ózgertip te úlgerdi. «Astana LRT» qazir CTS dep atalady.
Erbol TURYMBET
