Astana English School halyqaralyq mektebinde 900 mln teńgeden asa qarjy jymqyrylǵan. Bul iske qatysty tyń derek belgili boldy, - dep habarlaidy Dalanews.kz.
Jýrnalist Syrym Itqulovtyń aitýynsha, Astanada 81 English School-dyń burynǵy direktory, shamamen bir milliard teńgeni jymqyrdy degen kúdikpen ustalǵan - Gúlnar Sadyqova.
"Ol - Indira Asanbaevanyń anasy. Esterińizde bolsa, Indira – Dima Bilannyń kontsertinde Bishimbaevty súigen áiel. Keiinirek sot protsesi kezinde ol Bishimbaevpen tek jumys barysynda tanys bolǵanyn málimdegen edi", - dep jazylǵan málimette.
Buǵan deiin ne belgili?
Qarjylyq monitoring agenttigi málimetinshe, mekteptiń burynǵy direktory men bas býhgalteri 900 mln teńgeden asa aqshany zańsyz iemdengen.
Tergeý nátijesinde bul somanyń bir bóligi – ata-analardan daiyndyq synyptaryna oqytý jáne jazǵy lagerge qatysý úshin qolma-qol alynǵan aqsha ekeni, alaida bul qarajat mekeme shottaryna túspei, urlanǵany anyqtalǵan.
"Sonymen qatar, shamamen 16 mln teńge is júzinde uiymda jumys istemeitin jalǵan qyzmetkerler atyna aýdarylǵan. Olardyń qatarynda kúdiktilerdiń jalǵan túrde rásimdelgen týystary da bar", - dep jazylǵan habarlamada.
Jymqyrylǵan qarjyǵa kúdiktiler jalpy quny 382 mln teńge bolatyn jyljymaityn múlik pen avtokólik satyp alǵan. Onyń ishinde elordadaǵy bir kottedj, eki páter jáne kólik bary belgili boldy.
Qazir bul múlik sot sanktsiiasymen tárkilenip, tyiym salyndy.
Qylmystyq iske qatysty tergeý jalǵasyp jatyr.
