Astana ákimdigi G-park kompaniiasynyń jumysyn óz baqylaýyna aldy. Bul týraly elorda ákimi Jeńis Qasymbek málimdedi, dep habarlaidy Dalanews.kz.
"Qazirgi tańda qalada jer tolyq rásimdelmese de, kompaniia salyp jatqan 12-13 nysan bar. Biz G-park-ke kómek kórsetýdemiz. Úleskerlerdi úimen qamtamasyz etý úshin kompaniia jumysyn barynsha tezdetýge tyrysyp jatyrmyz. Bul iske bas suqpaýymyzǵa bolar edi. Sebebi jerdiń kóbi zańsyz alynǵan. Tipti keibireýiniń ieleri basqa", - dedi Jeńis Qasymbek.
Onyń aitýynsha, ákimdik G-park jumysyn óz nazaryna almasa, úi salý merzimi taǵy bes jylǵa uzaratyn kórinedi. Osy tusta ákim saiajai ielerimen jer máselesi boiynsha kelissóz júrgizilip jatqanyn da alǵa tartty. Sonymen qatar turǵyn úi nysandarynyń basym bóligi osy jazda aiaqtalady dep sendirdi.
"Biyl barlyq nysannyń 80 paiyzy aiaqtalady dep úmtitenemiz. Olar 12 turǵyn úidi bitirmei, jańa qurylys salýǵa ruqsat almaidy. Árbir úidiń qurylysy erekshe baqylaýda", - dep sózin túiindedi ákim.
Eske salaiyq, 2023 jyldyń 4 sáýirinde sot G-park salǵan Dublin turǵyn úi keshenin kúreltetini týraly sheshim shyǵarǵan bolatyn. Óitkeni úi qurylysy zańsyz júrgizilgen. Turǵyn úi kesheni ornyqqan jerge jylý trassasy salynbaq bolǵan. Sonymen qatar sot Vashington turǵyn úi keshenin kúreltýge de buiryq bergen edi. Alaida keiinirek ákimdik atalmysh turǵyn úi keshenindegi páterlerdi satyp alýshylar baspanasyn alady dep málimdeme jasaǵan bolatyn.
