Saýda jáne ıntegrasıa mınıstriniń mindetin atqarýshy Qaırat Tórebaev, Indýstrıa jáne ınfraqurylymdyq damý mınıstriniń mindetin atqarýshy Qaıyrbek Óskenbaev, Aýyl sharýashylyǵy mınıstriniń mindetin atqarýshy Erbol Qarashókeev, ulttyq ekonomıka mınıstriniń mindetin atqarýshy Tımýr Jaqsylyqov «Nur Otan» partıasynyń saılaýaldy baǵdarlamasynda alǵa qoıylǵan kórsetiletin qyzmetter men taýarlardyń shıkizattyq emes eksportynyń kólemin 2025 jylǵa qaraı $41 mlrd-qa deıin 2 esege arttyrý jónindegi mindetti iske asyrý barysy týraly baıandady. Bıyl osy kórsetkishtiń $29,2 mlrd deıin ósýin qamtamasyz etý kózdelgen.
Osy jyldyń 5 aıynyń qorytyndysy boıynsha Qazaqstannyń syrtqy taýar aınalymy ótken jyldyń sáıkes kezeńimen salystyrǵanda 1%-ǵa artyp, $36,4 mlrd qurady. Bul rette shıkizattyq emes taýarlar eksportynyń kólemi 23,4%-ǵa ósip, $7,2 mlrd qurady. Eń joǵary ósim metalýrgıada 27,5%, qurylys ındýstrıasynda 25,8% farmasevtıka salasynda 18,4%, hımıa ónerkásibinde 4,6% deńgeıinde baıqalady.
AÓK óńdelgen óniminiń eksporty ótken jyldyń sáıkes kezeńimen salystyrǵanda 10,8%-ǵa ósip, $545,8 mln nemese AÓK eksportynyń jalpy kóleminiń 33%-yn qurady. Eksport qurylymynda un men makaron ónimderi, ósimdik maılary, maqta talshyǵy, et jáne sút ónimderi, kondıterlik ónimder sekildi taýarlar basym.
Shıkizattyq emes taýarlar men kórsetiletin qyzmetterdiń eksportyn arttyrý maqsatynda eksporttaýshylardy memlekettik qoldaý sharalary – jeńildikpen nesıe berý jáne saqtandyrý, eksporttaýshylar shyǵyndarynyń bir bóligin óteý, eksporttyq akselerasıa, elektrondyq platformalarǵa shyǵarý jáne t. b. iske asyrylyp jatyr.
Úkimet basshysy ındýstrıa jáne ınfraqurylymdyq damý, aýyl sharýashylyǵy mınıstrlikterine ishki naryqty jáne eksporttyq áleýetti damytýdy qamtamasyz etýge múmkindik beretin óńdeý ónerkásibi ónimderi óndirisiniń jetkilikti kólemin qamtamasyz etýdi tapsyrdy.
Syrtqy ister, saýda jáne ıntegrasıa mınıstrlikterine salalyq memlekettik organdarmen eldik eksporttyq baǵdarlamalardyń jobalaryn kelisý jáne otandyq ónimderdi syrtqy naryqtarda ilgeriletý boıynsha belsendi jumystardy bastaý tapsyryldy.
Eńbek jáne halyqty áleýmettik qorǵaý mınıstri Serik Shápkenov, Mádenıet jáne sport mınıstriniń mindetin atqarýshy Nurǵısa Dáýeshov, Ulttyq ekonomıka mınıstriniń mindetin atqarýshy Tımýr Jaqsylyqov, Túrkistan oblysynyń ákimi Ómirzaq Shókeev, Shymkent qalasynyń ákimi Murat Áıtenov, Jambyl oblysy ákiminiń orynbasary Talǵat Mamaev «Nur Otan» partıasynyń saılaýaldy baǵdarlamasynda alǵa qoıylǵan 2025 jylǵa deıin 259 mádenıet nysanyn salý boıynsha mindetterdiń iske asyrylý barysy týraly baıandady.
Jumystardy qarjylandyrý «Jumyspen qamtý jol kartasy», «Aýyl – el besigi», «Bıznestiń jol kartasy» baǵdarlamalary, jergilikti búdjet, memlekettik-jekeshelik áriptestik jáne basqa da kózder esebinen júzege asyrylady.
Bıyl elimizde 89 mádenıet nysanynyń qurylysy josparlanýda, onyń ishinde 12 – Túrkistan oblysynda, 10 – Jambyl oblysynda, 9 – Almaty oblysynda, 7 – Shyǵys Qazaqstan jáne Soltústik Qazaqstan oblystarynda, 6-dan – Aqtóbe jáne Qyzylorda oblystarynda, 5-den – Aqmola, Qaraǵandy jáne Pavlodar oblystarynda, 4-den – Batys Qazaqstan jáne Mańǵystaý oblystarynda, 3-den – Atyraý jáne Qostanaı oblystarynda, 2 – Almaty qalasynda, 1 – Nur-Sultan qalasynda.
Bilim jáne ǵylym mınıstri Ashat Aımaǵambetov «Nur Otan» partıasynyń saılaýaldy baǵdarlamasyn iske asyrý aıasynda 2021-2025 jyldar aralyǵynda elimizde 800 jańa mektep paıdalanýǵa beriletinin aıtty. Bıyl 200 mektep salý josparlanýda, onyń ishinde nysanaly qurylys esebinen – 163 mektep, MJÁ tetigi esebinen – 6 mektep, jekemenshik mektepter jelisin damytý esebinen 31 mektep paıdalanýǵa beriledi.
Bıyl 200 mekteptiń ashylýy apatty mektepterdiń, úsh aýysymdy mektepterdiń problemasyn basym tártippen sheshýge jáne oqýshy oryndarynyń tapshylyǵyn qysqartýǵa múmkindik beredi.
Mektepter qurylysynyń kestesin iske asyrý boıynsha jumystardyń barysy týraly Nur-Cultan qalasynyń ákimi Altaı Kólginov, Almaty oblysynyń ákimi Amandyq Batalov, Túrkistan oblysynyń ákimi Ómirzaq Shókeev tyńdaldy.
Premer-Mınıstr «Nur Otan» partıasynyń saılaýaldy baǵdarlamasynyń Jol kartasyn iske asyrý máseleleri Úkimettiń erekshe baqylaýynda ekenin atap ótti.
«Nur Otan» partıasynyń saılaýaldy baǵdarlamasyn iske asyrý boıynsha barlyq ortalyq memlekettik jáne jergilikti atqarýshy organdardyń belsendi ári júıeli jumysy qajet», — dedi A. Mamın.
