ساۋدا جانە ينتەگراسيا ءمينيسترىنىڭ مىندەتىن اتقارۋشى قايرات تورەبايەۆ، يندۋستريا جانە ينفراقۇرىلىمدىق دامۋ ءمينيسترىنىڭ مىندەتىن اتقارۋشى قايىربەك وسكەنبايەۆ، اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەيەۆ، ۇلتتىق ەكونوميكا ءمينيسترىنىڭ مىندەتىن اتقارۋشى تيمۋر جاقسىلىقوۆ «Nur Otan» پارتياسىنىڭ سايلاۋالدى باعدارلاماسىندا العا قويىلعان كورسەتىلەتىن قىزمەتتەر مەن تاۋارلاردىڭ شيكىزاتتىق ەمەس ەكسپورتىنىڭ كولەمىن 2025 جىلعا قاراي $41 ملرد-قا دەيىن 2 ەسەگە ارتتىرۋ جونىندەگى مىندەتتى ىسكە اسىرۋ بارىسى تۋرالى باياندادى. بيىل وسى كورسەتكىشتىڭ $29،2 ملرد دەيىن ءوسۋىن قامتاماسىز ەتۋ كوزدەلگەن.
وسى جىلدىڭ 5 ايىنىڭ قورىتىندىسى بويىنشا قازاقستاننىڭ سىرتقى تاۋار اينالىمى وتكەن جىلدىڭ سايكەس كەزەڭىمەن سالىستىرعاندا 1%-عا ارتىپ، $36،4 ملرد قۇرادى. بۇل رەتتە شيكىزاتتىق ەمەس تاۋارلار ەكسپورتىنىڭ كولەمى 23،4%-عا ءوسىپ، $7،2 ملرد قۇرادى. ەڭ جوعارى ءوسىم مەتاللۋرگيادا 27،5%، قۇرىلىس يندۋسترياسىندا 25،8% فارماسيەۆتيكا سالاسىندا 18،4%، حيميا ونەركاسىبىندە 4،6% دەڭگەيىندە بايقالادى.
اوك وڭدەلگەن ءونىمىنىڭ ەكسپورتى وتكەن جىلدىڭ سايكەس كەزەڭىمەن سالىستىرعاندا 10،8%-عا ءوسىپ، $545،8 ملن نەمەسە اوك ەكسپورتىنىڭ جالپى كولەمىنىڭ 33%-ىن قۇرادى. ەكسپورت قۇرىلىمىندا ۇن مەن ماكارون ونىمدەرى، وسىمدىك مايلارى، ماقتا تالشىعى، ەت جانە ءسۇت ونىمدەرى، كونديتەرلىك ونىمدەر سەكىلدى تاۋارلار باسىم.
شيكىزاتتىق ەمەس تاۋارلار مەن كورسەتىلەتىن قىزمەتتەردىڭ ەكسپورتىن ارتتىرۋ ماقساتىندا ەكسپورتتاۋشىلاردى مەملەكەتتىك قولداۋ شارالارى – جەڭىلدىكپەن نەسيە بەرۋ جانە ساقتاندىرۋ، ەكسپورتتاۋشىلار شىعىندارىنىڭ ءبىر بولىگىن وتەۋ، ەكسپورتتىق اكسەلەراسيا، ەلەكتروندىق پلاتفورمالارعا شىعارۋ جانە ت. ب. ىسكە اسىرىلىپ جاتىر.
ۇكىمەت باسشىسى يندۋستريا جانە ينفراقۇرىلىمدىق دامۋ، اۋىل شارۋاشىلىعى مينيسترلىكتەرىنە ىشكى نارىقتى جانە ەكسپورتتىق الەۋەتتى دامىتۋدى قامتاماسىز ەتۋگە مۇمكىندىك بەرەتىن وڭدەۋ ونەركاسىبى ونىمدەرى ءوندىرىسىنىڭ جەتكىلىكتى كولەمىن قامتاماسىز ەتۋدى تاپسىردى.
سىرتقى ىستەر، ساۋدا جانە ينتەگراسيا مينيسترلىكتەرىنە سالالىق مەملەكەتتىك ورگاندارمەن ەلدىك ەكسپورتتىق باعدارلامالاردىڭ جوبالارىن كەلىسۋ جانە وتاندىق ونىمدەردى سىرتقى نارىقتاردا ىلگەرىلەتۋ بويىنشا بەلسەندى جۇمىستاردى باستاۋ تاپسىرىلدى.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ، مادەنيەت جانە سپورت ءمينيسترىنىڭ مىندەتىن اتقارۋشى نۇرعيسا داۋەشوۆ، ۇلتتىق ەكونوميكا ءمينيسترىنىڭ مىندەتىن اتقارۋشى تيمۋر جاقسىلىقوۆ، تۇركىستان وبلىسىنىڭ اكىمى ءومىرزاق شوكەيەۆ، شىمكەنت قالاسىنىڭ اكىمى مۇرات ايتەنوۆ، جامبىل وبلىسى اكىمىنىڭ ورىنباسارى تالعات مامايەۆ «Nur Otan» پارتياسىنىڭ سايلاۋالدى باعدارلاماسىندا العا قويىلعان 2025 جىلعا دەيىن 259 مادەنيەت نىسانىن سالۋ بويىنشا مىندەتتەردىڭ ىسكە اسىرىلۋ بارىسى تۋرالى باياندادى.
جۇمىستاردى قارجىلاندىرۋ «جۇمىسپەن قامتۋ جول كارتاسى»، «اۋىل – ەل بەسىگى»، «بيزنەستىڭ جول كارتاسى» باعدارلامالارى، جەرگىلىكتى بيۋدجەت، مەملەكەتتىك-جەكەشەلىك ارىپتەستىك جانە باسقا دا كوزدەر ەسەبىنەن جۇزەگە اسىرىلادى.
بيىل ەلىمىزدە 89 مادەنيەت نىسانىنىڭ قۇرىلىسى جوسپارلانۋدا، ونىڭ ىشىندە 12 – تۇركىستان وبلىسىندا، 10 – جامبىل وبلىسىندا، 9 – الماتى وبلىسىندا، 7 – شىعىس قازاقستان جانە سولتۇستىك قازاقستان وبلىستارىندا، 6-دان – اقتوبە جانە قىزىلوردا وبلىستارىندا، 5-دەن – اقمولا، قاراعاندى جانە پاۆلودار وبلىستارىندا، 4-دەن – باتىس قازاقستان جانە ماڭعىستاۋ وبلىستارىندا، 3-دەن – اتىراۋ جانە قوستاناي وبلىستارىندا، 2 – الماتى قالاسىندا، 1 – نۇر-سۇلتان قالاسىندا.
ءبىلىم جانە عىلىم ءمينيسترى اسحات ايماعامبەتوۆ «Nur Otan» پارتياسىنىڭ سايلاۋالدى باعدارلاماسىن ىسكە اسىرۋ اياسىندا 2021-2025 جىلدار ارالىعىندا ەلىمىزدە 800 جاڭا مەكتەپ پايدالانۋعا بەرىلەتىنىن ايتتى. بيىل 200 مەكتەپ سالۋ جوسپارلانۋدا، ونىڭ ىشىندە نىسانالى قۇرىلىس ەسەبىنەن – 163 مەكتەپ، ءمجا تەتىگى ەسەبىنەن – 6 مەكتەپ، جەكەمەنشىك مەكتەپتەر جەلىسىن دامىتۋ ەسەبىنەن 31 مەكتەپ پايدالانۋعا بەرىلەدى.
بيىل 200 مەكتەپتىڭ اشىلۋى اپاتتى مەكتەپتەردىڭ، ءۇش اۋىسىمدى مەكتەپتەردىڭ پروبلەماسىن باسىم تارتىپپەن شەشۋگە جانە وقۋشى ورىندارىنىڭ تاپشىلىعىن قىسقارتۋعا مۇمكىندىك بەرەدى.
مەكتەپتەر قۇرىلىسىنىڭ كەستەسىن ىسكە اسىرۋ بويىنشا جۇمىستاردىڭ بارىسى تۋرالى نۇر-Cۇلتان قالاسىنىڭ اكىمى التاي كولگىنوۆ، الماتى وبلىسىنىڭ اكىمى اماندىق باتالوۆ، تۇركىستان وبلىسىنىڭ اكىمى ءومىرزاق شوكەيەۆ تىڭدالدى.
پرەمەر-مينيستر «Nur Otan» پارتياسىنىڭ سايلاۋالدى باعدارلاماسىنىڭ جول كارتاسىن ىسكە اسىرۋ ماسەلەلەرى ۇكىمەتتىڭ ەرەكشە باقىلاۋىندا ەكەنىن اتاپ ءوتتى.
«Nur Otan» پارتياسىنىڭ سايلاۋالدى باعدارلاماسىن ىسكە اسىرۋ بويىنشا بارلىق ورتالىق مەملەكەتتىك جانە جەرگىلىكتى اتقارۋشى ورگانداردىڭ بەلسەندى ءارى جۇيەلى جۇمىسى قاجەت»، — دەدى ا. مامين.
