Áskeriler 19 jastaǵy sarbaz Dosbol Sapardyń qalai kóz jumǵanyn aityp berdi
Áskeriler 19 jastaǵy sarbaz Dosbol Sapardyń qalai kóz jumǵanyn aityp berdi
Otan aldyndaǵy boryshyn jarty jyl ǵana atqarǵan bozdaqtyń jasy nebári 19-da bolatyn dep habarlaidy KTK arnasy.
Ákesi tuńǵyshy Dosboldyń mańdaiynan sońǵy márte sipap aqtyq saparǵa shyǵaryp saldy. Lańkestik shabýyl kezinde oqqa ushqan Dosbol Saparmen qoshtasýǵa tańerteńnen beri júzdegen adam aǵylýda. Janazaǵa 300 shaqyrymdyq jerden oblys ákimi orynbasarlarymen jetse, Astanadan arnaiy kelgen generaldar da osynda. Al jaýyngerdiń denesin Aqtóbeden ákelgen basshylyǵy Dosboldyń qandai jaǵdaida kóz jumǵanyn aityp berdi.
"Qatardaǵy jaýynger Sapar sol kúni áskeri patrýldik top qyzmetinde bolǵan. Tártip boiynsha 2 jaýynger bolady. Ústerinde bronejilet kiiledi. Beti men aiaǵyna oq tigen", - deidi «Batys» óńirlik qolbasshylyǵynyń basqarma bastyǵy Álisher Ábdirásil.
Dosboldyń denesi ózi turǵan Kóksý aýylynyń irgesindegi qorymǵa jerlendi. Munda jaýyngerler erlikpen qaza tapqan qarýlasy úshin áskeri dástúrmen qurmet bildirdi. Marqum úi ishimen bir apta buryn ǵana sóilesken eken.
"Bundai jaǵdaidy kútken joqpyz. Aýrýhanada jatyr dep keldik qoi", - deidi marqumnyń ákesi Erkinbek Ábdiqadirov.
Qazir, Aqtóbedegi №6655 áskeri bóliminde jaraqat alǵan taǵy bir ońtústikqazaqstandyq sarbaz emdelip jatyr. Birneshe jerine oq tigen 22 jastaǵy Syrym Súndetov esin jiǵan soń Shymkentke jóneltiletin boldy. Ol da Dosbolmen byltyr qysta ǵana áskerge barǵan.
Otan qorǵap júrip nebári 19 jasynda sheiit bolǵan Dosbol Sapardyń otbasyna kóńil aityp kelip jatqandardyń qarasy azaiar emes. Endi Shardara aýdanynyń jurty 40 kún aza tutady. Al marqumnyń týystaryna barlyq kómekti kórsetemiz dep sendirgen óńir basshylary batyrdyń esimin ózi turǵan kóshege nemese aýyl mektebine berý máselesin qarastyryp jatyr.
Derekkózi: nur.kz
