Qorǵanys ministriniń birinshi orynbasary-Qazaqstan Respýblikasy Qarýly Kúshteri Bas shtabynyń bastyǵy Sultan Qamaletdinov Májilistegi komitet otyrysynda Qarýly kúshterdiń qazirgi jaǵdaiyna toqtaldy, dep habarlaidy Dalanews.kz.
Ol áskeri qyzmetshilerdiń áskerden jappai ketýine bailanysty alańdaýshylyǵyn jetkizdi. Aitýynsha, jyl saiyn bul kórsetkish azaimai otyr.
“Tek 2020-2023 jyldar aralyǵynda Qarýly Kúshterden 17065 áskeri qyzmetshi bosatyldy, onyń ishinde 4301 ofitser jáne kelisimshart boiynsha 12764 áskeri qyzmetshi bar. Salystyrý úshin, bul shamamen 15 brigadanyń sanyna para-par”, – dedi Qamaletdinov.
Ol atap ótkendei, tórt jyl ishinde Qarýly kúshterden 17065 áskeri qyzmetshi shyǵarylǵan. Onyń ishinde:
- 4301 ofitser;
- Kelisimshart boiynsha 12764 áskeri;
- Densaýlyq jaǵdaiy jáne shekti jasqa jetýi boiynsha – 5289, onyń ishinde 1926 ofitser;
- Kelisimshart boiynsha 3363 áskeri qyzmetshi;
- Basqa sebepter boiynsha– 11776, onyń ishinde 2375 ofitser.
- Kelisimshart boiynsha 9401 áskeri qyzmetshi.
“Búginde Armiiany áskeri qyzmetkerlermen qamtamasyz etý kásibi daiyndalǵan kadrlardyń joǵalýyn ótemeitinin eskerý qajet. Osy kezeńde Qarýly Kúshter qataryna 14311 áskeri qyzmetshi qosyldy”, – dedi ol.
