قورعانىس ءمينيسترىنىڭ ءبىرىنشى ورىنباسارى-قازاقستان رەسپۋبليكاسى قارۋلى كۇشتەرى باس شتابىنىڭ باستىعى سۇلتان قامالەتدينوۆ ماجىلىستەگى كوميتەت وتىرىسىندا قارۋلى كۇشتەردىڭ قازىرگى جاعدايىنا توقتالدى، دەپ حابارلايدى Dalanews.kz.

ول اسكەري قىزمەتشىلەردىڭ اسكەردەن جاپپاي كەتۋىنە بايلانىستى الاڭداۋشىلىعىن جەتكىزدى. ايتۋىنشا، جىل سايىن بۇل كورسەتكىش ازايماي وتىر.

“تەك 2020-2023 جىلدار ارالىعىندا قارۋلى كۇشتەردەن 17065 اسكەري قىزمەتشى بوساتىلدى، ونىڭ ىشىندە 4301 وفيسەر جانە كەلىسىمشارت بويىنشا 12764 اسكەري قىزمەتشى بار. سالىستىرۋ ءۇشىن، بۇل شامامەن 15 بريگادانىڭ سانىنا پارا-پار”، – دەدى قامالەتدينوۆ.

ول اتاپ وتكەندەي، ءتورت جىل ىشىندە قارۋلى كۇشتەردەن 17065 اسكەري قىزمەتشى شىعارىلعان. ونىڭ ىشىندە:

• 4301 وفيسەر؛


• كەلىسىمشارت بويىنشا 12764 اسكەري؛


• دەنساۋلىق جاعدايى جانە شەكتى جاسقا جەتۋى بويىنشا – 5289، ونىڭ ىشىندە 1926 وفيسەر؛


• كەلىسىمشارت بويىنشا 3363 اسكەري قىزمەتشى؛


• باسقا سەبەپتەر بويىنشا– 11776، ونىڭ ىشىندە 2375 وفيسەر.


• كەلىسىمشارت بويىنشا 9401 اسكەري قىزمەتشى.

“بۇگىندە ارميانى اسكەري قىزمەتكەرلەرمەن قامتاماسىز ەتۋ كاسىبي دايىندالعان كادرلاردىڭ جوعالۋىن وتەمەيتىنىن ەسكەرۋ قاجەت. وسى كەزەڭدە قارۋلى كۇشتەر قاتارىنا 14311 اسكەري قىزمەتشى قوسىلدى”، – دەدى ول.