Qazaqstan Respýblikasy Úkimetiniń «Jastarǵa áskeri-patriottyq tárbie berýdiń 2030 jylǵa deiingi tujyrymdamasyn bekitý týraly» qaýlysy aiasyndaǵy mindetterdi iske asyrý maqsatynda Almaty qalasynda respýblikalyq seminar-praktikým ótti. Is-shara Qazaqstan Respýblikasynyń Qorǵanys ministrligi qoldaýymen, Almaty qalasy Bilim basqarmasy uiymdastyrýymen ótkizildi, dep habarlaidy Dalanews.kz.
Seminar jumysyna «Jas sarbaz» respýblikalyq áskeri-patriottyq qozǵalysynyń filial tóraǵalary men alǵashqy áskeri jáne tehnologiialyq daiyndyq pániniń oqytýshylary qatysty.
Jiyndy qozǵalys tóraǵasy Meiirbek Meńdiǵaliev ashyp, áskeri-patriottyq tárbieniń mazmunyn jańǵyrtý, jańa zańnamalyq ózgeristerdi tiimdi engizý jáne jas urpaq boiynda azamattyq jaýapkershilikti qalyptastyrý máselelerine toqtaldy.
Seminar aiasynda Almaty qalasy Alataý aýdanyndaǵy №210 mektep-litseidiń «Jas sarbaz» synyby úlgili tájiribe retinde tanystyryldy.
Atalǵan bilim ordasynda 2025 jylǵy 9 jeltoqsanda «Jas sarbaz» synyby men Ulttyq ulan batyrlary atyndaǵy «Erlik synyby» ashylǵan. 26 oqýshy saltanatty túrde ant qabyldap, mekteptiń «Jas sarbaz» Týy tabystaldy. Is-sharaǵa qoǵam qairatkerleri, bilim berý salasynyń ókilderi jáne áskeri qurylym qyzmetkerleri qatysyp, buqaralyq aqparat quraldarynda keńinen jariialandy.
Búginde 210 mektep-litseidiń «Jas sarbaz» synyby qala kólemindegi áskeri-patriottyq is-sharalardyń belsendi qatysýshysy. Oqýshylar Aýǵan soǵysy ardagerlerimen kezdesip, Qazaqstan Respýblikasy Ulttyq ulany quramyndaǵy 7552 áskeri bóliminde Áskeri ant qabyldaý rásimine qatysyp, sarbazdardyń tynys-tirshiligimen tanysty.
Bul – Ulttyq ulannyń jas urpaq tárbiesine júieli túrde qamqorlyq jasap otyrǵanynyń naqty kórinisi. Búginde Ulttyq ulan qamqorlyǵyna alǵan 210 mektep-litsei áskeri-patriottyq tárbieniń qalalyq deńgeidegi tirek alańyna ainalyp otyr.
Mekteptiń alǵashqy áskeri daiyndyq pániniń muǵalimi, zapastaǵy polkovnik Niiaztai Álkeshev óz sózinde bastamanyń mańyzyn erekshe atap ótti:
–Bizdiń maqsatymyz – óskeleń urpaqty joǵary azamattyq belsendilikke, patriotizmge, kereǵar ideialarǵa qarsy turýǵa tárbieleý. Ásker jasyna deiingi jastar arasynda quqyq buzýshylyqtyń aldyn alý jáne bolashaq Otan qorǵaýshylardy daiarlaý – ortaq mindet. Sondyqtan bir jaǵadan bas, bir jeńnen qol shyǵaryp jumys isteýimiz qajet. Biz bolashaq Qarýly Kúshter, ózge de áskerler men áskeri qurylymdardyń sapyn tolyqtyratyn urpaqty tárbielep otyrmyz.
Polkovnik Niiaztai Álkeshevtiń aitýynsha, «Jas sarbaz» synybyna qyzyǵýshylyq jyl saiyn artyp keledi. Kelesi oqý jylynda qosymsha synyp ashý josparda bar. Sonymen qatar mamyr aiynda Almaty qalalyq Politsiia departamentiniń qoldaýymen «Jas saqshy» synybyn ashý kózdelip otyr.
Seminar baǵdarlamasy alǵashqy áskeri jáne tehnologiialyq daiyndyq pánin júrgizýdegi normativtik-quqyqtyq qujattardy túsindirýdi, atys daiyndyǵyndaǵy ádis-tásilderdi jetildirýdi, ozyq pedagogikalyq tájiribeni taratýdy qamtydy. Sonymen qatar bilim berý úderisinde jasandy intellekt elementterin paidalaný, ushqyshsyz ushý apparattaryn (drondardy) qoldaný máseleleri qarastyryldy.
Bul bastamalar áskeri-patriottyq tárbieni jańa deńgeige kóterip, mektep qabyrǵasynan bastap sanaly, tártipti ári otansúigish urpaq qalyptastyrýǵa baǵyttalǵan.
