قازاقستان رەسپۋبليكاسى ۇكىمەتىنىڭ «جاستارعا اسكەري-پاتريوتتىق تاربيە بەرۋدىڭ 2030 جىلعا دەيىنگى تۇجىرىمداماسىن بەكىتۋ تۋرالى» قاۋلىسى اياسىنداعى مىندەتتەردى ىسكە اسىرۋ ماقساتىندا الماتى قالاسىندا رەسپۋبليكالىق سەمينار-پراكتيكۋم ءوتتى. ءىس-شارا قازاقستان رەسپۋبليكاسىنىڭ قورعانىس مينيسترلىگى قولداۋىمەن، الماتى قالاسى ءبىلىم باسقارماسى ۇيىمداستىرۋىمەن وتكىزىلدى، دەپ حابارلايدى Dalanews.kz.
سەمينار جۇمىسىنا «جاس سارباز» رەسپۋبليكالىق اسكەري-پاتريوتتىق قوزعالىسىنىڭ فيليال ءتوراعالارى مەن العاشقى اسكەري جانە تەحنولوگيالىق دايىندىق ءپانىنىڭ وقىتۋشىلارى قاتىستى.
جيىندى قوزعالىس ءتوراعاسى مەيىربەك مەڭدىعالييەۆ اشىپ، اسكەري-پاتريوتتىق تاربيەنىڭ مازمۇنىن جاڭعىرتۋ، جاڭا زاڭنامالىق وزگەرىستەردى ءتيىمدى ەنگىزۋ جانە جاس ۇرپاق بويىندا ازاماتتىق جاۋاپكەرشىلىكتى قالىپتاستىرۋ ماسەلەلەرىنە توقتالدى.
سەمينار اياسىندا الماتى قالاسى الاتاۋ اۋدانىنداعى №210 مەكتەپ-ليسەيدىڭ «جاس سارباز» سىنىبى ۇلگىلى تاجىريبە رەتىندە تانىستىرىلدى.
اتالعان ءبىلىم ورداسىندا 2025 جىلعى 9 جەلتوقساندا «جاس سارباز» سىنىبى مەن ۇلتتىق ۇلان باتىرلارى اتىنداعى «ەرلىك سىنىبى» اشىلعان. 26 وقۋشى سالتاناتتى تۇردە انت قابىلداپ، مەكتەپتىڭ «جاس سارباز» تۋى تابىستالدى. ءىس-شاراعا قوعام قايراتكەرلەرى، ءبىلىم بەرۋ سالاسىنىڭ وكىلدەرى جانە اسكەري قۇرىلىم قىزمەتكەرلەرى قاتىسىپ، بۇقارالىق اقپارات قۇرالدارىندا كەڭىنەن جاريالاندى.
بۇگىندە 210 مەكتەپ-ليسەيدىڭ «جاس سارباز» سىنىبى قالا كولەمىندەگى اسكەري-پاتريوتتىق ءىس-شارالاردىڭ بەلسەندى قاتىسۋشىسى. وقۋشىلار اۋعان سوعىسى ارداگەرلەرىمەن كەزدەسىپ، قازاقستان رەسپۋبليكاسى ۇلتتىق ۇلانى قۇرامىنداعى 7552 اسكەري بولىمىندە اسكەري انت قابىلداۋ راسىمىنە قاتىسىپ، ساربازداردىڭ تىنىس-تىرشىلىگىمەن تانىستى.
بۇل – ۇلتتىق ۇلاننىڭ جاس ۇرپاق تاربيەسىنە جۇيەلى تۇردە قامقورلىق جاساپ وتىرعانىنىڭ ناقتى كورىنىسى. بۇگىندە ۇلتتىق ۇلان قامقورلىعىنا العان 210 مەكتەپ-ليسەي اسكەري-پاتريوتتىق تاربيەنىڭ قالالىق دەڭگەيدەگى تىرەك الاڭىنا اينالىپ وتىر.
مەكتەپتىڭ العاشقى اسكەري دايىندىق ءپانىنىڭ ءمۇعالىمى، زاپاستاعى پولكوۆنيك نيازتاي الكەشيەۆ ءوز سوزىندە باستامانىڭ ماڭىزىن ەرەكشە اتاپ ءوتتى:
–ءبىزدىڭ ماقساتىمىز – وسكەلەڭ ۇرپاقتى جوعارى ازاماتتىق بەلسەندىلىككە، پاتريوتيزمگە، كەرەعار يدەيالارعا قارسى تۇرۋعا تاربيەلەۋ. اسكەر جاسىنا دەيىنگى جاستار اراسىندا قۇقىق بۇزۋشىلىقتىڭ الدىن الۋ جانە بولاشاق وتان قورعاۋشىلاردى دايارلاۋ – ورتاق مىندەت. سوندىقتان ءبىر جاعادان باس، ءبىر جەڭنەن قول شىعارىپ جۇمىس ىستەۋىمىز قاجەت. ءبىز بولاشاق قارۋلى كۇشتەر، وزگە دە اسكەرلەر مەن اسكەري قۇرىلىمداردىڭ ساپىن تولىقتىراتىن ۇرپاقتى تاربيەلەپ وتىرمىز.
پولكوۆنيك نيازتاي الكەشيەۆتىڭ ايتۋىنشا، «جاس سارباز» سىنىبىنا قىزىعۋشىلىق جىل سايىن ارتىپ كەلەدى. كەلەسى وقۋ جىلىندا قوسىمشا سىنىپ اشۋ جوسپاردا بار. سونىمەن قاتار مامىر ايىندا الماتى قالالىق پوليسيا دەپارتامەنتىنىڭ قولداۋىمەن «جاس ساقشى» سىنىبىن اشۋ كوزدەلىپ وتىر.
سەمينار باعدارلاماسى العاشقى اسكەري جانە تەحنولوگيالىق دايىندىق ءپانىن جۇرگىزۋدەگى نورماتيۆتىك-قۇقىقتىق قۇجاتتاردى ءتۇسىندىرۋدى، اتىس دايىندىعىنداعى ادىس-تاسىلدەردى جەتىلدىرۋدى، وزىق پەداگوگيكالىق تاجىريبەنى تاراتۋدى قامتىدى. سونىمەن قاتار ءبىلىم بەرۋ ۇدەرىسىندە جاساندى ينتەللەكت ەلەمەنتتەرىن پايدالانۋ، ۇشقىشسىز ۇشۋ اپپاراتتارىن (درونداردى) قولدانۋ ماسەلەلەرى قاراستىرىلدى.
بۇل باستامالار اسكەري-پاتريوتتىق تاربيەنى جاڭا دەڭگەيگە كوتەرىپ، مەكتەپ قابىرعاسىنان باستاپ سانالى، ءتارتىپتى ءارى وتانسۇيگىش ۇرپاق قالىپتاستىرۋعا باعىتتالعان.
