OKQ brifinginde Qazaqstan Qarýly Kúshteri Bas shtaby Uiymdastyrý-jumyldyrý jumysy departamenti bastyǵynyń orynbasary Rýslan Omarov Qazaqstan áskerinde álimjettik joq ekenin málimdedi, - dep habarlaidy Dalanews.kz.
"Qazir áskerde "dedovshina" joq ekenin túsiný kerek. "Dedovshina" uǵymy aǵa jáne kishi shaqyrýshylar arasyndaǵy kelispeýshilikterdi bildiredi. Qazir qarýly kúshter men basqa da áskeri qyzmetterde áskerge shaqyrylýshylardyń bir ǵana ókilderi shuǵyl qyzmet atqaryp jatqanyn eskersek, "dedovshina" týraly sóz qozǵamaýymyz kerek", - dedi Omarov Tengrinews.kz-ke.
Aita keteiik, bir ǵana qyrkúiekte áskeri salada birneshe qaiǵyly oqiǵa boldy:
7 qyrkúiekte Mańǵystaý poligonynda merzimdi áskeri qyzmetshi jaraqat saldarynan kóz jumdy. Jaýyngerdi vzvod komandiri atyp óltirgen. Qaitys bolǵan sarbazdyń ákesi Qorǵanys ministrine beineúndeý joldady. Qorǵanys ministrligi keiinirek kináliler qatań jaýapkershilikke tartylatynyn málimdedi.
16 qyrkúiekte Qazaqstannyń ońtústigindegi Arys garnizonynyń áskeri bóliminiń kelisimshart boiynsha áskeri qyzmetshisi travmatikalyq qarýdan jaraqat aldy.
19 qyrkúiekte Aiagózde áskeri qyzmetshiniń denesi tabyldy. Áskeri garnizonnyń aldyn ala málimetteri boiynsha ofitser óz-ózine qol jumsaǵan.
22 qyrkúiekte Petropavlda kelisimshart boiynsha áskeri qyzmetkerdiń denesi tabyldy. Bul derek boiynsha qylmystyq is qozǵaldy.
30 qyrkúiekte Aqtaýda dekrettik demalystaǵy áskeri qyzmetshi óz-ózine qol jumsaǵany belgili boldy. Marqum 39 jasta bolǵan, onyń denesi óz páterinde tabylǵan.
Resmi málimetike súiensek, keiingi úsh jylda Qazaqstanda 270 áskeri qyzmetker qaitys bolǵan, al sońǵy tórt jylda áskerde 86 sýitsid tirkelgen, 20 áskeri adam óz-ózine qol salýǵa oqtalǵan.
Ashyq derekkóz málimetteri boiynsha ólim-jitimniń kóp taraǵan sebepteri: aýrý – 36 paiyz, jol apattarynyń saldary – 24 paiyz, sýitsid – 20 paiyz.
