– Almaty oblysynyń ákimi Amandyq Batalovtyń tapsyrmasyna sáikes keshe karantindegi turǵyn úi kesheninde turǵyndarmen jiyn ótkizdik. Kezdesý barysynda birinshi kezekte azyq-túlikke óte muqtaj adamdardy anyqtadyq. Óitkeni karantinnen bólek turǵyndardyń kópshiligi jumyssyz qaldy. Oǵan qosa aldaǵy ýaqytta sheshimi qarastyrylatyn birqatar turmystyq máseleler talqylandy, – dedi oblys ákiminiń orynbasary Serik Turdaliev.
– Biz olarǵa budan bylai da qoldaý kórsetemiz. Muqtaj adamdardyń tizimi basqarýshy kompaniialardan kelip túsýde. Azyq-túlikten basqa turǵyn úi keshenine 10 myńdai bir rettik maskalar aparyp berildi. Olar tegin taratylýda.
Ákimdik ókilderiniń aitýynsha, birinshi kezekte kóp balaly, az qamtylǵan otbasylar, múgedekter, qart adamdar jáne jumyssyz qalǵandar siiaqty halyqtyń áleýmettik áljýaz toptary eskerildi. Turǵyn úi keshenine azyq-túlik taratý isine keshende turatyn turǵyndar arasynan shyqqan volonterlar belsendi qatysýda.
– Jaǵdaidy ózderińiz kórip otyrsyzdar. Biz jumyssyz qaldyq, ómir súrýge kerekti qajettilikterge zárýmiz. Ýaiymdai bastap edik, biraq ákimdik bizdi qiyndyqta jalǵyz qaldyrǵan joq. Qoldap, kómek kórsetip jatyr, – dedi «Asyl arman» TK turǵyny Aleksandr Tsoi.
Atap ótsek, turǵyndardyń kópshiligi úilerin ipotekamen alǵandyqtan, jergilikti bilik ipoteka tóleminiń máselesin qarastyrýda.
«Bul másele ár jaǵdaidy jeke-jeke alyp qarastyrylatyn bolady», – dedi oblys ákiminiń orynbasary Serik Turdaliev.
Sol siiaqty TK turǵyndary karantin aiaqtalǵannan keiin «Jumyspen qamtý jol kartasy» boiynsha jumysqa tura alatyndyǵy da aityldy.
Jalpy, qoldaýdyń qosymsha sharalarynyń arqasynda jumystan shyǵyp qalǵan jáne jumyssyz azamattar úshin 68 myń jumys orny ashylatyn bolady.
Máselen, «Eńbek» baǵdarlamasy sheńberinde jumyspen qamtý sharalarymen 22 myń adamdy qamtý josparlanǵan. Jumys oryndaryn qurýda Memleket basshysynyń Jumyspen qamtý jol kartasyna 1 trln. teńge bólý týraly sheshimi zor yqpal etedi. Sol qatarda bizdiń oblysqa 109,2 mlrd. teńge bólindi. Bul qarjyǵa 22,8 myń jumys ornyn quratyn 977 joba júzege asyrylmaq.
