Grýziiada qaitys bolǵan qazaq qyzynyń ápkesiniń aitýynsha, taǵy eki qyz alys týysqanynyń qurbany bolýy múmkin.
"Astana" telearnasynyń habarlaýynsha, qaiǵyly oqiǵadan keiin zardap shekkenderdiń ózderi týystarynyń úiine barǵan. Biraq tergeý múddesi úshin olar kameraǵa sóileýden bas tartty. Murat Meiirbekov ótken demalys kúnderi Nur-Sultanda ustalǵany habarlandy. Ol adam saýdasy aiyby boiynsha kúdikti retinde tanylǵan.
Qyz Grýziiadaǵy kópqabatty úidiń terezesi aldynan óli kúiinde tabyldy. Onda ol alys týysynyń shaqyrýymen jumysqa barǵan. Bul óte óreskel qatelik boldy deidi marqumnyń týystary. Áseldiń ápkesiniń aitýynsha, ol árqashan shetelde ómir súrýdi armandaǵan. Óz páterine aqsha jinaǵysy kelgen. Qyz úiine tabytpen oralady dep eshkim oilamaǵan.
Eger ony bóten bireý shaqyrsa, ol shetelge barmas edi. Biz de ony jibermes edik. Al bul rette týysymyz ǵoi, shynymen de kómektesip jiberedi dep úmittenip, sendik. Sóitsek Ásel onyń birinshi qurbany emes eken. Instagram arqyly bizge taǵy eki qyz shyqty. Myna Meiirbekov ol eki qyzǵa da shyǵyp, shetelge shaqyrypty, - deidi marqumnyń ápkesi.
Óler aldynda Ásel otbasyna er adammen bolǵan ózara sózdiń aýdiohabarlama jibergen. Onda boijetken Meiirbekovtiń ózine birneshe ret qorlyq kórsetkenin aitady. Grýziia prokýratýrasy oǵan syrttai zorlaý aiybyn tandy. Kúdiktiniń ózi qaiǵyly oqiǵadan keiin Tbilisiden birden qashyp ketken. Er adam demalys kúnderi Qazaqstan astanasynda ustaldy. Munda ol adam saýdasy boiynsha kúdikti retinde ustalǵan.
Sebebi adam Qazaqstan Respýblikasynyń aýmaǵynda qylmys jasaǵan bolsa, onda ol osy jerde jaýap beredi. Sondai-aq, halyqaralyq shartta adamdardy aiǵaq berýge nemese kúdiktilerden jaýap alý ushin bir-birine berý múmkindigi qarastyrylǵan, - dedi advokat Vladimir Vatyk.
Kúdikti ustalyp, Nur-Sultandaǵy ýaqytsha ustaý izoliatoryna qamaldy. Tergeý áreketteri júrgizilýde, sotqa deiingi tergeý jalǵasýda.
Qazaqstandaǵy adam quqyqtary jónindegi ýákil de istiń barysyn jeke óz qadaǵalaýyna aldy.
