Sputnik-georgia habarlaǵandaı, 2021 jyly 28 mamyrda qylmystyq-atqarý mekemesine túsken kezde aıyptalýshy medısınalyq tekserýden ótip, oǵan arterıalyq gıpertenzıa dıagnozy qoıylǵan. Osyǵan baılanysty ol únemi medısınalyq personaldyń baqylaýynda boldy.
2021 jyly 30 maýsymda Tordýa qatty bas aýyryp, dárigermen keńesip, esinen tanǵanyn da aıtqan. Sóıleý qabileti buzylyp, qan qysymy kóterilgen.
Tordýa basyndaǵy qan aınalymynyń (boljamdy) buzylýyna baılanysty jedel járdem kóligimen azamattyq klınıkaǵa jetkizildi.
Klınıkada ótkizilgen mıdyń kompúterlik tomografıasy jáne nevropatologtyń konsýltasıasynyń nátıjeleri boıynsha dıagnoz qoıyldy: serebraldy ınfarktqa kúdik keltirildi.
Aýyr jaǵdaıyna baılanysty aıyptalýshy jansaqtaý bólimine jatqyzyldy, em-dom júrgizilip, qarqyndy terapıanyń baqylaýynda boldy. Neırohırýrgtyń konsýltasıasy boıynsha oǵan jedel hırýrgıalyq ota qajettiligi týyndady. Operasıadan keıin naýqastyń jalpy jaǵdaıy aýyr dep baǵalandy, gemodınamıkalyq kórsetkishter turaqsyz boldy, dep jazady basylym.
Emdeýge qaramastan, naýqastyń jaǵdaıy nasharlap, 2021 jyldyń 14 shildesinde anomaldy júrek yrǵaǵy (bradıarıtmıa) tirkeldi, ol kóp uzamaı asıstolaǵa aýysty, ıaǵnı júrek qyzmetiniń toqtaýy.
Júrek-ókpe reanımasıasy tolyqtaı hattamaǵa sáıkes júrgizildi, biraq júrektiń mehanıkalyq qyzmeti qalpyna kelmedi. Bıologıalyq ólim tirkeldi, delingen habarlamada.
Tbılısıde 26 jastaǵy Qazaqstan azamaty Ásel Aıtpaevanyń óli denesi tabylǵannan keıin ózin-ózi óltirýge ıtermeledi jáne zorlady degen kúdikpen polısıa Zýgdıdıdiń týmasy Besık Tordýany ustady.
