Siriia prezidenti Bashar Asad Damask eger Siriia oppozitsiiasymen kelissóz ótkizý usynysy iske assa "ne nársege qatysty bolsa da" dialogqa daiyn ekenin málimdedi.
Asad 9 qańtarda siriialyq SANA agenttiginde jariialanǵan, frantsýz jýrnalisterine bergen suhbatynda kelissóz merzimi belgilene salysymen ózi basqaratyn úkimettiń kelissózge qatysatyn delegatsiiasy daiyn bolatynyn aitty.
Resei, Iran jáne Túrkiia beibit kelissózdi Astanada ótkizýdi usynǵan. Al Túrkiia syrtqy ister ministri Mevliýt Chavýshoglý kelissóz 23 qańtarda bastalýy múmkin ekenin málimdegen. Siriianyń oppozitsiiashyl toptary Astanada kelissóz ótkizý múmkinshilikterin talqylap jatqanymen, oǵan qatysatyny týraly áli resmi túrde bildirgen joq.
Asad suhbatynda kelissózge "shynaiy" oppozitsiiashyl toptardyń qatysqany mańyzdy ekenin bildirip, Siriiadaǵy Saýd Arabiiasy men Batys elderi qoldaityn oppozitsiiashyl kúshterdiń bitim ornatýdaǵy rólin azaitýǵa tyrysty. "Shynaiy" degende men Saýd Arabiiasy, Frantsiia nemese Ulybritaniia qoldaityndardy emes, halyqtyń óz ishinen shyqqan oppozitsiiany aityp turmyn. Siriianyń máselelerin Siriia oppozitsiiasy talqylaýy tiis" dedi Asad.
Bashar Asad sonymen qatar bolashaqta Siriia prezidenttigine qaita sailaýǵa túsýden bas tartý usynysyna qatysty kommentarii berýden bas tartyp, ol másele "Siriia halqynyń qalaýyna bailanysty sheshiletinin" aitty.
