Arys qalasynyń ákimi Qaisar Manqaraev Astana – Pavlodar tas jolynda bolǵan aýyr jol-kólik oqiǵasyna alǵash ret túsinikteme berdi. Apat saldarynan 21 jastaǵy Talǵat aýyr jaraqat alyp, eki aiaǵynan aiyrylǵan, dep habarlaidy dalanews.kz Newtimes.kz saityna silteme jasap.
Ákim eń aldymen zardap shekken stýdent pen onyń otbasyna kóńil aityp, jigittiń tezirek saýyǵyp ketýine tilektestik bildirdi.
«Bul jaǵdai meniń otbasym úshin de aýyr synaq boldy. Eń aldymen jol apatynan aýyr jaraqat alǵan jas jigitke jáne onyń týǵan-týystaryna shynaiy janashyrlyǵymdy bildiremin. Oǵan kúsh-qýat, tezirek saýyǵyp, qalypty ómirge oralýyn tileimin. Atalǵan jol-kólik oqiǵasynyń bolǵanyn rastaimyn. Sondai-aq kólikti meniń ulym basqarǵanyn da rastaimyn. Ol – kámeletke tolǵan azamat jáne zań aldynda óz áreketi úshin ózi jaýap beredi», – dedi Qaisar Manqaraev.
Ákimniń aitýynsha, ol ulyna renjigenimen, jol apaty abaisyzdyq saldarynan bolǵanyn eskerýge shaqyrdy. Onyń sózinshe, dál osyndai jaǵdaiǵa óz ulynyń da tap bolýy múmkin edi. Sonymen qatar Manqaraev qazir atalǵan is boiynsha sotqa deiingi tergeý júrip jatqanyn aityp, tergeý aiaqtalmaiynsha oqiǵanyń mán-jaiyna qatysty pikir bildirýdi orynsyz dep sanaitynyn jetkizdi.
«Tergeýge yqpal etpeimin»
Qala ákimi óziniń qyzmettik laýazymyn paidalanyp, tergeý barysyna áser etedi degen boljamdardy joqqa shyǵardy.
«Men eshqashan qyzmettik ókilettigimdi jeke múddem úshin paidalanǵan emespin jáne paidalanbaimyn. Tergeý barysyna nemese is boiynsha qabyldanatyn protsessýaldyq sheshimderge yqpal etýge áreket jasaǵan joqpyn jáne jasamaimyn. Tergeý Qazaqstan Respýblikasynyń zańnamasyna sáikes ýákiletti memlekettik organdar tarapynan júrgizilýi tiis jáne solai júrgiziledi. Zań barshaǵa birdei, onyń ishinde meniń otbasy múshelerime de», – dedi ol.
Zardap shekken taraptyń kúdigi
Telefon arqyly sóilesken kezde ákim ulynyń jol qozǵalysy erejeleriniń 29-tarmaǵyn buzǵany týraly aqparatty naqtylaý qajet ekenin aitty. Sondai-aq uly buryn Astanada tirkelgenin, keiin qandai sebeppen Ekibastuz qalasyna tirkeýi aýystyrylǵanyn bilmeitinin jetkizdi.
Al zardap shekken stýdenttiń týystary mundai tirkeýdiń ózgertilýi kúdiktini úiqamaqqa shyǵarý úshin jasalǵan bolýy múmkin degen kúmán keltirip otyr.
Oqiǵa týraly
Eske salaiyq, Astana – Pavlodar tas jolynda bolǵan jantúrshigerlik jol apaty saldarynan pavlodarlyq 21 jastaǵy stýdent Talǵat eki aiaǵynan aiyryldy. Ol otyrǵan jeńil kólik jol jiegindegi temir qorshaýǵa soǵylyp, qorshaý kóliktiń salonyn tesip ótken.
Kólikti Arys qalasynyń ákimi Qaisar Manqaraevtyń 22 jastaǵy uly basqarǵan.
Zardap shekken jigittiń týystarynyń aitýynsha, júrgizýshi sońǵy bir jyldyń ishinde jol qozǵalysy erejesin buzǵany úshin 29 ret jaýapkershilikke tartylǵan. Soǵan qaramastan, sot ony úiqamaqqa jibergen. Marqumnyń emes, zardap shekken azamattyń jaqyndary kúdiktiniń qyzmettik bailanystary jaýapkershilikten jaltarýyna yqpal etýi múmkin dep alańdap otyr.
