Арыс қаласының әкімі Қайсар Манқараев Астана – Павлодар тас жолында болған ауыр жол-көлік оқиғасына алғаш рет түсініктеме берді. Апат салдарынан 21 жастағы Талғат ауыр жарақат алып, екі аяғынан айырылған, деп хабарлайды dalanews.kz Newtimes.kz сайтына сілтеме жасап.
Әкім ең алдымен зардап шеккен студент пен оның отбасына көңіл айтып, жігіттің тезірек сауығып кетуіне тілектестік білдірді.
«Бұл жағдай менің отбасым үшін де ауыр сынақ болды. Ең алдымен жол апатынан ауыр жарақат алған жас жігітке және оның туған-туыстарына шынайы жанашырлығымды білдіремін. Оған күш-қуат, тезірек сауығып, қалыпты өмірге оралуын тілеймін. Аталған жол-көлік оқиғасының болғанын растаймын. Сондай-ақ көлікті менің ұлым басқарғанын да растаймын. Ол – кәмелетке толған азамат және заң алдында өз әрекеті үшін өзі жауап береді», – деді Қайсар Манқараев.
Әкімнің айтуынша, ол ұлына ренжігенімен, жол апаты абайсыздық салдарынан болғанын ескеруге шақырды. Оның сөзінше, дәл осындай жағдайға өз ұлының да тап болуы мүмкін еді. Сонымен қатар Манқараев қазір аталған іс бойынша сотқа дейінгі тергеу жүріп жатқанын айтып, тергеу аяқталмайынша оқиғаның мән-жайына қатысты пікір білдіруді орынсыз деп санайтынын жеткізді.
«Тергеуге ықпал етпеймін»
Қала әкімі өзінің қызметтік лауазымын пайдаланып, тергеу барысына әсер етеді деген болжамдарды жоққа шығарды.
«Мен ешқашан қызметтік өкілеттігімді жеке мүддем үшін пайдаланған емеспін және пайдаланбаймын. Тергеу барысына немесе іс бойынша қабылданатын процессуалдық шешімдерге ықпал етуге әрекет жасаған жоқпын және жасамаймын. Тергеу Қазақстан Республикасының заңнамасына сәйкес уәкілетті мемлекеттік органдар тарапынан жүргізілуі тиіс және солай жүргізіледі. Заң баршаға бірдей, оның ішінде менің отбасы мүшелеріме де», – деді ол.
Зардап шеккен тараптың күдігі
Телефон арқылы сөйлескен кезде әкім ұлының жол қозғалысы ережелерінің 29-тармағын бұзғаны туралы ақпаратты нақтылау қажет екенін айтты. Сондай-ақ ұлы бұрын Астанада тіркелгенін, кейін қандай себеппен Екібастұз қаласына тіркеуі ауыстырылғанын білмейтінін жеткізді.
Ал зардап шеккен студенттің туыстары мұндай тіркеудің өзгертілуі күдіктіні үйқамаққа шығару үшін жасалған болуы мүмкін деген күмән келтіріп отыр.
Оқиға туралы
Еске салайық, Астана – Павлодар тас жолында болған жантүршігерлік жол апаты салдарынан павлодарлық 21 жастағы студент Талғат екі аяғынан айырылды. Ол отырған жеңіл көлік жол жиегіндегі темір қоршауға соғылып, қоршау көліктің салонын тесіп өткен.
Көлікті Арыс қаласының әкімі Қайсар Манқараевтың 22 жастағы ұлы басқарған.
Зардап шеккен жігіттің туыстарының айтуынша, жүргізуші соңғы бір жылдың ішінде жол қозғалысы ережесін бұзғаны үшін 29 рет жауапкершілікке тартылған. Соған қарамастан, сот оны үйқамаққа жіберген. Марқұмның емес, зардап шеккен азаматтың жақындары күдіктінің қызметтік байланыстары жауапкершіліктен жалтаруына ықпал етуі мүмкін деп алаңдап отыр.
